Madaxweynaha Jamhuuriyadda iskeed ugu dhawaaqday madaxbannaanida ee Somaliland, Cabdiraxmaan Maxamed Cabdillaahi (Cirro), ayaa maanta u ambabaxay magaalada Jabuuti ee caasimadda dalka Jabuuti, isagoo ka jawaabaya martiqaad rasmi ah oo uu ka helay dhiggiisa dalkaasi.
Wefdiga Madaxweynaha ayaa ka kooban xubno sare oo ka tirsan golaha wasiirrada iyo la-taliyeyaal dhow, kuwaas oo la filayo inay ka qeyb galaan kulammo dhowr ah oo lagu xoojinayo xiriirka labada dhinac.
Ujeedka safarka Madaxweynaha Somaliland ayaa salka ku haya dib u dhiska xidhiidhka diblomaasiyadeed, kor u qaadidda iskaashiga ganacsi iyo sidii looga shaqeyn lahaa arrimaha nabadda iyo amniga gobolka.
Safarkan ayaa kusoo beegmaya xilli uu jiro cadaadis diblomaasiyadeed oo ka dhashay heshiiskii is-faham ee Somaliland la saxiixatay dowladda Itoobiya, taasoo ay Jabuuti horey uga soo horjeesatay. Si kastaba, waxaa la rumeysan yahay in safarka Cirro uu qayb ka yahay dadaallada dib loogu hagaajinayo xiriirka labada dhinac.
Madaxweyne Cirro ayaa sidoo kale kulamo gaar ah la yeelan doona madaxda Jabuuti, waxaana lagu wadaa in la isku afgartay arrimo muhiim ah oo la xiriira horumarinta ganacsiga, xoojinta amniga iyo iskaashi dhaqaale oo dhexmara labada dal.
Tan iyo intii xilka loo doortay, Cirro wuxuu safarro dibadeed ku tagay dalal ay ka mid yihiin Imaaraadka Carabta, iyadoo socdaalkiisa Jabuuti uu noqonayo kisii saddexaad oo dibadeed ee uu aado tan iyo markii uu xilka la wareegay
