Wararka24: Shabakadda rasmiga ah ee Wasaaradda Arrimaha Dibadda iyo Iskaashiga Caalamiga ah ee Somaliland ayaa la sheegay in la jabsaday, kaddib markii bogga lagu baahiyay sawirro ay ku jiraan xubno ka tirsan kooxda Xuutiyiinta Yemen, oo uu ka mid yahay afhayeenkooda Yaxye Sariic.
Ilaa hadda ma jiro war rasmi ah oo kasoo baxay xukuumadda Somaliland ama Wasaaradda Arrimaha Dibadda oo ku saabsan cidda ka dambeysay weerarkan ama sida loogu suurtagashay in lagu galo nidaamka wasaaradda.
Dhacdadan ayaa kusoo aadeysa xilli ay jireen hadallo iyo hanjabaado hore oo ay Xuutiyiintu ku muujiyeen diidmadooda xiriirka sii xoogeysanaya ee la sheegay inuu ka dhexeeyo Somaliland iyo Israa’iil. Hase yeeshee, ma jirto caddeyn rasmi ah oo xaqiijinaysa in kooxda fulisay weerarka ay xiriir la leedahay Xuutiyiinta.
Xuutiyiinta, oo loo yaqaan Ansar Allah, ayaa tan iyo markii uu billowday dagaalka Gaza kordhiyay weerarrada ay ku bartilmaameedsanayaan maraakiibta Badda Cas iyo bartilmaameedyo ku yaalla Israa’iil, iyagoo sheegay inay taageerayaan shacabka Falastiin.
Somaliland ayaa toddobaadyadii u dambeeyay si weyn u soo jiidatay indhaha caalamka sababo la xiriira wararka ku saabsan xiriirkeeda Israa’iil, arrintaas oo dhalisay falcelin kala duwan oo ka timid dhinacyo gobolka ah.
Khubarada amniga dhijitaalka ah ayaa tilmaamaya in dhacdadan ay muujineyso baahida loo qabo in la xoojiyo ilaalinta nidaamyada internet-ka ee hay’adaha dowladda, si looga hortago weerarro la mid ah kuwa lagu bartilmaameedsado kaabayaasha muhiimka ah ee dowladnimada.
Maamulka Somaliland ayaan weli soo saarin qiimeyn rasmi ah oo ku saabsan khasaaraha ka dhashay jabsiga, waxaana la filayaa in baaritaanno dheeraad ah lagu sameeyo dhacdadan.
