Wararka24: Madaxweynaha Somaliland Cabdiraxmaan Maxamed Cabdillaahi (Cirro) ayaa sheegay in Israa’iil iyo Denmark ay yihiin labada dal ee keliya ee ka jawaabay waraaqihii ay Somaliland u dirtay dalalka xubnaha ka ah Qaramada Midoobay ee la xiriiray codsiga aqoonsiga.
Madaxweynaha oo ka hadlay munaasabadda xuska 26-ka Juun ayaa sheegay in Israa’iil ay Somaliland ku wargelisay inay aqoonsanayso, halka Denmark ay sheegtay inay bogaadineyso horumarka iyo waxqabadka Somaliland, balse aysan xilligan bixin karin aqoonsi rasmi ah.
Cirro ayaa sheegay in booqashadiisii Israa’iil ay u xaqiijisay in aqoonsigaasi yahay mid dhab ah. Wuxuu xusay in wafdigiisa lagu soo dhaweeyay maamuus heer qaran ah, isla markaana labada dhinac ay kala saxiixdeen heshiis iskaashi oo hordhac ah.
Sida uu sheegay Madaxweynaha Somaliland, heshiiskaasi wuxuu khuseeyaa dhinacyada amniga, beeraha, biyaha iyo caafimaadka. Wuxuu sidoo kale tilmaamay in iskaashiga dhinaca biyaha uu durba billowday, iyadoo injineerro ka socda Somaliland ay tababarro uga socdaan Israa’iil.
Madaxweyne Cirro ayaa sheegay in in ka badan 1,000 shirkadood oo Israa’iili ah ay codsadeen inay la kulmaan wafdiga Somaliland, balse kulamada lagu koobay 100 shirkadood. Wuxuu arrintaas ku tilmaamay inay muujineyso xiisaha maalgashi ee ay shirkadahaasi u qabaan Somaliland.
Waxa uu sidoo kale shaaciyay in Guddoomiyaha Golaha Wakiillada Somaliland la filayo inuu booqasho ku tago Israa’iil, kadib martiqaad uu ka helay Guddoomiyaha Baarlamaanka Israa’iil. Dowladda Federaalka Soomaaliya iyo dowladda Denmark ayaan weli si rasmi ah uga hadlin hadallada uu jeediyay Madaxweynaha Somaliland.
