Wararka24: Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa sheegay in dowladda ay diyaar u tahay inay dhegeysato cabashooyinka iyo tabashooyinka laga qabo gobollada Waqooyi, si loo helo waddo lagu xoojinayo wadajirka iyo midnimada Soomaaliyeed.
Isagoo ka hadlayay munaasabadda 26-ka Juun ee lagu qabtay Muqdisho, madaxweynuhu wuxuu sheegay in Soomaaliya ay maanta haysato fursado horumarineed oo ka duwan kuwii hore, isagoo xusay in horumarka waxbarashada iyo ka qaybgalka bulshada ay muujinayaan isbeddel muuqda oo dalka ka socda.
Madaxweyne Xasan Sheekh ayaa sheegay in toban sano ka hor shacabka Soomaaliyeed aysan si buuxda ugu dhiirran karin inay xusaan 26-ka Juun, balse maanta ay waddooyinka isugu soo baxeen 65 kun oo arday oo ka qalin-jabiyay dugsiyada hoose, iyo ku dhowaad 50 kun oo arday oo u fadhiistay imtixaanka dugsiyada sare. Wuxuu sheegay in arrintaas ay muujineyso fursadda maanta u
soo hoyatay qaranka
Xasan Sheekh ayaa sheegay in dowladnimada aan lagu dhisi karin awood ciidan oo keliya, balse ay saldhig u yihiin aqoon, wada-hadal iyo is-afgarad. Wuxuu xusay in halgankii gobannimada ay door weyn ku lahaayeen shacabka gobollada Waqooyi, kuwaas oo qayb muhiim ah ka qaatay xornimada Soomaaliya.
Madaxweynaha ayaa sheegay in dowladda ay garowsan tahay inay jiraan tabashooyin la xiriira taariikhda iyo siyaasadda, isagoo xusay in ay diyaar u yihiin inay sii wadaan dadaallada lagu xallinayo arrimahaas. Wuxuu carrabka ku adkeeyay in aan laga daali doonin raadinta xal waara oo ku dhisan wada-hadal iyo is-qancin.
Sidoo kale, wuxuu sheegay in qorshaha dowladda ee ku aaddan Somaliland dib loogu eegayo siyaasad ahaan, si loo helo hannaan cusub oo horseedi kara kalsooni iyo isu soo dhowaansho. Wuxuu intaas ku daray in dowladda aysan aqbali doonin hadallo meel ka dhac ku ah shacabka gobollada Waqooyi, isla markaana loo baahan yahay is-ixtiraam iyo wadajir.
Madaxweynaha ayaa ugu dambeyn sheegay in dowladda ay sii wadi doonto dadaallada lagu xoojinayo midnimada dalka iyo dowladnimada Soomaaliya, isagoo shacabka ugu hambalyeeyay munaasabadaha 26-ka Juun iyo 1-da Luulyo, una rajeeyay nabad, horumar iyo wadajir.
