Wararka24: Dowladda Federaalka Soomaaliya ayaa ugu baaqday dalalka xubnaha ka ah Jaamacadda Carabta inay ka fogaadaan wax kasta oo fududeyn kara xiriir ama maalgashi lala yeesho Somaliland, iyadoo ku adkaysatay mowqifkeeda ku aaddan midnimada iyo wadajirka dalka.
Wasiiru-dowlaha Arrimaha Dibadda Soomaaliya, Cali Maxamed Cumar (Cali Balcad), ayaa hadalkan ka jeediyay furitaankii shirka Golaha Jaamacadda Carabta ee ka dhacay magaalada Amman ee dalka Jordan.
Mas’uulku wuxuu sheegay in Soomaaliya ay walaac ka qabto dhaqdhaqaaqyada diblomaasiyadeed iyo xiriirrada caalamiga ah ee Somaliland ay la sameyneyso dalal iyo hay’ado kala duwan. Wuxuu carrabka ku adkeeyay in Somaliland ay weli qayb ka tahay Jamhuuriyadda Federaalka Soomaaliya, sidaas darteedna aan loo aqoonsan karin dal madax-bannaan.
Cali Balcad ayaa ugu baaqay dowladaha Carabta inay hubiyaan in dhulkooda, dekedahooda, shirkadahooda iyo nidaamyadooda maaliyadeed aan loo adeegsan maalgelin, sharciyeyn ama fududeyn wax kasta oo Soomaaliya u aragto xiriir aan waafaqsaneyn mowqifkeeda qaran.
Sidoo kale, wuxuu sheegay in ilaalinta midnimada dhuleed ee Soomaaliya ay la jaanqaadayso mabda’a dhowrista madax-bannaanida iyo wadajirka dalalka xubnaha ka ah Jaamacadda Carabta. Dowladda Soomaaliya ayaa sheegtay inay ka soo horjeeddo tallaabo kasta oo horseedi karta aqoonsi ama sharciyeyn loo sameeyo dhaqdhaqaaqyada gooni isu taagga ah.
Wasiiru-dowlaha ayaa xusay in Soomaaliya aysan doonayn xiisad cusub ama iska horimaad siyaasadeed, balse ay xaq u leedahay difaaca madax-bannaanideeda, midnimadeeda iyo xuduudaheeda caalamku aqoonsan yahay.
Baaqan ayaa imanaya xilli ay Somaliland sii waddo dadaallada ay ku ballaarinayso xiriirradeeda dibadda iyo iskaashiyada ay la yeelanayso dhinacyo kala duwan. Arrintan ayaa weli kamid ah qodobbada ugu waaweyn ee muranka siyaasadeed ka dhex abuuray Muqdisho iyo Hargeysa.
