Wararka24: Guddoomiyaha Guddiga Madax-bannaan ee Dib-u-eegista iyo Hirgelinta Dastuurka, Burhaan Aadan Cumar, ayaa sheegay in dhammaan hay’adaha dowladda looga baahan yahay inay si buuxda u dhaqan-geliyaan dastuurka cusub ee dhowaan la ansixiyay.
Burhaan ayaa sheegay in dastuurku yahay saldhigga maamulka, sharciyeynta iyo hannaanka dowladnimo ee dalka, isaga oo xusay in hirgelintiisu aysan ku koobnayn daabacaadda iyo qaybinta nuqullada dastuurka oo keliya.
Guddoomiyuhu wuxuu carrabka ku adkeeyay in hay’adaha sharci-dejinta, fulinta iyo garsoorka ay waajib ku tahay inay shaqooyinkooda ku saleeyaan qodobbada dastuurka. Wuxuu sidoo kale tilmaamay in xeerar muhiim ah oo dalka yaalla loo baahan yahay in dib loogu waafajiyo dastuurka cusub.
Wuxuu sheegay in sharciyada la xiriira doorashooyinka, axsaabta siyaasadda iyo maamulka dalka ay ka mid yihiin xeerarka mudnaanta leh ee u baahan dib-u-habeyn si ay ula jaanqaadaan qodobbada dastuurka.
Burhaan Aadan Cumar ayaa sidoo kale shaaciyay in guddigu diyaariyay nuqullo dijitaal ah oo dastuurka ah, kuwaas oo shacabka Soomaaliyeed u sahli doona inay si toos ah uga helaan internet-ka. Sida uu sheegay, adeeggan waxaa hirgelisay shirkad Soomaaliyeed oo ka shaqeysa tiknoolajiyadda.
Guddoomiyuhu wuxuu xusay in geeddi-socodka dib-u-eegista iyo dhammaystirka dastuurka uu qaatay waqti dheer, balse uu ku tilmaamay tallaabo muhiim ah oo Soomaaliya u horseeday inay yeelato dastuur ay ka shaqeeyeen hay’ado dowladeed iyo khubaro Soomaaliyeed.
Wuxuu intaas ku daray in marxaladaha xiga ay ka mid yihiin dhismaha hay’adaha uu dastuurku farayo, waafajinta dastuurada dowlad-goboleedyada iyo hirgelinta qodobbada weli harsan ee la xiriira nidaamka dowladeed.
Hadalka Burhaan ayaa kusoo beegmaya xilli dastuurka cusub uu weli ka taagan yahay muran siyaasadeed, iyadoo dhinacyo kala duwan ay ka qabaan aragtiyo kala duwan oo ku saabsan qaabka loo ansixiyay iyo hirgelintiisa.
