Wararka24: Golaha Wasiirrada Dowladda Federaalka Soomaaliya ayaa maanta yeelanaya shir aan caadi ahayn oo looga hadlaya arrimo siyaasadeed iyo kuwo dastuuri ah, xilli ay dalka ka jirto xiisad siyaasadeed oo sii xoogeysaneysa.
Wararka laga helayo shirka ayaa sheegaya in dowladda ay qorsheyneyso dhaqan-gelinta dastuurka cusub ee uu ansixiyay Baarlamaanka Federaalka Soomaaliya, kaas oo ay si weyn uga soo horjeesteen siyaasiyiinta mucaaradka iyo qaar kamid ah maamullada dalka.
Xassan Sheekh Maxamud iyo dowladda federaalka ayaa ku adkeysanaya in muddo xileedka hay’adaha dowladda uu yahay shan sano, isla markaana dalka loo gudbinayo nidaam doorasho qof iyo cod ah.
Shirkan ayaa kusoo aadaya kadib markii ay fashilmeen wada-hadalladii ka socday xerada Xalane ee u dhexeeyay dowladda iyo mucaaradka, kuwaas oo lagu isku dayayay in xal looga gaaro khilaafka doorashooyinka iyo maamulka marxaladda kala guurka.
Mucaaradka ayaa dhankooda wada tashiyo ka wada tallaabooyinka ay uga hortagayaan qorshaha dowladda, iyadoo beesha caalamka ay labada dhinac ugu baaqeyso inay dib ugu laabtaan wada-hadallada iyo isu tanaasulka siyaasadeed.
Dowladda Federaalka Soomaaliya ayaa Jimcihii ku dhawaaqday in dalka si rasmi ah loogu gudbayo nidaam dimuqraadi ah oo ku dhisan mabda’a qof iyo cod, kadib markii lagu kala kacay wadahadalladii Muqdisho.
Warsaxaafadeed kasoo baxay dowladda ayaa lagu sheegay in siyaasiyiinta mucaaradka ay diideen qorshaha doorashooyinka dadweynaha, halka dowladda ay sheegtay inay ka go’an tahay in shacabka Soomaaliyeed ay helaan xuquuqdooda doorasho.
“Dowladda waxay la wadaagaysaa shacabka Soomaaliyeed in dalka ay ka qabsoomi doonto doorasho qof iyo cod ah, xor iyo xalaal ah,” ayaa lagu yiri qoraalka dowladda.
Sidoo kale, dowladda ayaa sheegtay in albaabka wada-hadalka iyo wadatashigu uu weli furan yahay, balse aysan gorgortan ka geli doonin hirgelinta doorashooyinka dadweynaha.
