Wararka24: Ururka Iskaashiga Islaamka (OIC) ayaa si kulul uga falcelisay qorshaha ay Somaliland ku dooneyso inay safaarad uga furato magaalada Qudus, taas oo ay Falastiiniyiintu u aqoonsan yihiin caasimaddooda mustaqbalka.
War-saxaafadeed kasoo baxay ururka ayaa lagu sheegay in tallaabadaasi ay ka hor imaaneyso shuruucda caalamiga ah iyo qaraarrada Qaramada Midoobay ee khuseeya xaaladda magaalada Qudus, islamarkaana ay tahay arrin sharci darro ah.
Ururka ayaa sidoo kale sheegay in qorshahaasi uu dhaawac ku yahay dadaallada lagu taageerayo shacabka reer Falastiin iyo xuquuqdooda siyaasadeed, maadaama magaalada Qudus ay kamid tahay arrimaha ugu xasaasisan khilaafka u dhexeeya Falastiin iyo Israa’iil.
“Go’aanka maamulka Waqooyi Galbeed ee Soomaaliya uu ku doonayo inuu safaarad uga furto Qudus wuxuu xoojinayaa sheegashada Israa’iil ee dhulka Falastiin. Marna ma aqbali doonno tallaabo kasta oo ka hor imaaneysa midnimada iyo madax-bannaanida Falastiin,” ayaa lagu yiri bayaanka OIC.
Ururka Iskaashiga Islaamka ayaa sidoo kale caddeeyay inuu taageersan yahay midnimada iyo wadajirka Jamhuuriyadda Federaalka Soomaaliya, isagoo sheegay inuu kasoo horjeedo tallaabo kasta oo dhaawaceysa madax-bannaanida Soomaaliya ama dhiirrigelin karta gooni isu-taag.
Hadalkan ayaa kusoo aadaya xilli ay isa soo tarayaan wararka sheegaya in Somaliland ay qorsheyneyso xiriir diblomaasiyadeed oo dhow oo ay la yeelato Israel, kadib markii Israa’iil ay si rasmi ah u sheegtay inay aqoonsatay Somaliland.
Dhanka kale, Safiirka cusub ee Somaliland u qaabilsan Israa’iil, Maxamed Xaaji, ayaa horey u sheegay in Somaliland ay safaarad ka furan doonto magaalada Qudus, halka Israa’iil ay iyaduna safaarad ka furan doonto magaalada Hargeysa.
Tallaabooyinkan ayaa dhaliyay falcelin xooggan oo ka timid dalal iyo ururro Islaami ah, kuwaas oo u arka arrintan mid khatar ku ah mowqifka Islaamka ee ku aaddan magaalada barakeysan ee Qudus iyo qadiyadda Falastiin.
