Roobab mahiigaan ah oo habeenkii xalay ka da’ay magaalada Muqdisho ayaa sababay khasaare isugu jira dhimasho, dhaawac, barakac iyo burbur hantiyeed. Wararka laga helayo ilo kala duwan ayaa tilmaamaya in roobabka xooggan ay keeneen daadad xooggan oo xiray qaar ka mid ah jidadka ugu muhiimsan magaalada, taasoo si weyn u saameysay isu socodka gaadiidka iyo nolosha dadka ku nool caasimada Muqdisho.
Maamulka gobalka banaadir ayaa sidoo kale ku baaqay in la helo caawimaad dheeraad ah si loo xakameeyo saameynta ka dhalatay robabka mahiigaanka ah, iyadoo laga cabsi qabo in robab kale ay sii da’aan maalmaha soo socda.
Roobka oo socday saacado badan ayaa sababay in biyo fariistaan xaafado badan oo Muqdisho ka tirsan, iyadoo dadka qaarkood laga soo badbaadiyay xaalado halis ah oo ay la kulmeen. Ilaa iyo hadda lama xaqiijin tirada saxda ah ee dadka ku dhintay ama burburka hantida ka dhashay,
balse maamulka gobolka Banaadir ayaa tan iyo xalay billaabay gurmad degdeg ah oo la gaarsiiyay dadka ay roobabku saameeyeen.
Waxaa la filayaa in roobab kale ay sii socdaan maalmaha soo socda, sida ay sheegayaan saadaasha hawadu, taasoo sii kordhin karta halista daadadka iyo burburka. Waxaa lagu booriyay shacabka in ay taxaddar muujiyaan, gaar ahaan dadka ku nool meelaha ay biyuhu si sahal ah u fariistaan.
Hoos kadaawo warbixinta Roobka xalay iyo dhimashada Sida aan kasoo xiganay UniversalTV
