Beijing – Madaxweynaha Shiinaha, Xi Jinping, ayaa sheegay in Beijing ay ixtiraamayso xaqa Iran u leedahay isticmaalka tamarta nukliyeerka si nabadeed, isla markaana Shiinuhu si buuxda u taageerayo difaaca madax-bannaanida iyo karaamada qaranka Iran. Hadalkan ayuu Xi ka sheegay kulan uu magaalada Beijing kula yeeshay madaxweynaha Iran, Masoud Pezeshkian.
Xi Jinping ayaa carrabka ku adkeeyay in Shiinaha uu qadarinayo ballan-qaadka Iran ee ah inaysan horumarin doonin hubka nukliyeerka ee halista ah. Wuxuu tilmaamay in xiriirka labada dal uu soo maray xilliyo adag, balse sanadihii u dambeeyay uu si joogto ah u kobcayay, isagoo sheegay in iskaashiga Beijing iyo Tehran uu ku dhisan yahay kalsooni iyo ixtiraam labada dhinac ah.
Madaxweynaha Shiinaha ayaa intaas ku daray in dalkiisu sii wadi doono taageerada xalka nabadeed ee ku saabsan arrinta nukliyeerka Iran, isla markaana uu garab istaagi doono dadaallada lagu gaadhayo nabad waarta oo ka hanaqaadda Bariga Dhexe.
