Wararka24: 25-01-2026 Baarlamaanka Carabta ayaa shaaciyay inuu qaadayo tallaabooyin siyaasadeed oo heer gobol iyo heer caalami ah, kuwaas oo lagu taageerayo amniga, xasilloonida iyo madaxbannaanida dalalka Yemen iyo Soomaaliya, isaga oo si cad u diiday faragelin kasta oo lagu sameeyo arrimaha gudaha ee labada dal.
Go’aankan ayaa lagu ansixiyay bayaan rasmi ah oo kasoo baxay Baarlamaanka Carabta intii lagu guda jiray furitaanka kalfadhigii labaad ee fadhiga guud ee wareegga labaad, ee cutubka sharci-dejinta afaraad, kaas oo ka dhacay xarunta Xoghaynta Guud ee Jaamacadda Carabta ee magaalada Qaahira.
Bayaanka ayaa xoogga saaray muhiimadda ay leedahay ixtiraamka mabda’a ah in aan lagu faragelin arrimaha gudaha dowladaha, isla markaana lagu dadaalo xalal nabadeed oo lagu ilaalinayo madax-bannaanida, amniga iyo midnimada dhuleed ee dalalka Carabta.
Baarlamaanka Carabta ayaa ugu baaqay dowladaha iyo baarlamaannada Carbeed inay muujiyaan midnimo iyo garab istaag buuxa oo ay la garab taagan yihiin Yemen iyo Soomaaliya, ayna qaadaan tallaabooyin wadajir ah oo lagu xaqiijinayo xasilloonida iyo amniga labada dal.
Sidoo kale, bayaanka ayaa mar kale lagu adkeeyay diidmada buuxda ee faragelin kasta oo shisheeye oo lagu sameeyo arrimaha gudaha dalalka Carabta, iyadoo lagu baaqay in la xoojiyo wada-shaqeynta siyaasadeed iyo diblomaasiyadeed ee lagu ilaalinayo madax-bannaanida qarannimada.
Go’aankan ayaa imanaya xilli ay jireen cadaadisyo diblomaasiyadeed oo sii kordhaya oo ay wadeen dalalka Carabta iyo kuwa Islaamka, kadib tallaabooyin la xiriiray aqoonsi muran dhaliyay oo ku saabsan Somaliland, kuwaas oo xoojinaya dadaallada Dowladda Federaalka Soomaaliya ee lagu difaacayo midnimada iyo madaxbannaanida dalka.
