Wararka24: Xafiiska Xeer Ilaaliyaha Guud ee Qaranka Soomaaliya ayaa faahfaahin ka bixiyay dacwadda ka dhanka ah Sacdiyo Macalin Cali, oo loo yaqaan Sacdiyo Bajaaj, kadib xariggeedii Sacdiyo Bajaaj ee magaalada Muqdisho.
War-saxaafadeed rasmi ah oo kasoo baxay xafiiska xeer ilaalinta ayaa lagu sheegay in Sacdiyo loo heysto eedeymo la xiriira sumcad dil iyo kicin bulsho, kuwaas oo lagu tilmaamay falal culus oo u baahan baaritaan sharciyeed oo dheeraad ah.
Xeer ilaalinta ayaa sheegtay in baaritaan qoto dheer uu hadda socdo, si loo xaqiijiyo sax ahaanshaha eedeymaha loo jeediyay iyo in la ururiyo dhammaan caddeymaha la xiriira gal-dacwadeedka.
Hay’addu waxay sheegtay in marka baarista la soo gabagabeeyo, dacwadda loo gudbin doono maxkamadda awoodda u leh si loo qaado tallaabooyin sharci oo waafaqsan nidaamka caddaaladda dalka.
Qoraalka kasoo baxay xeer ilaalinta ayaa lagu adkeeyay muhiimadda ilaalinta sharciga, ka hortagga dambiyada iyo difaaca sumcadda bulshada, iyadoo hay’addu sheegtay inay ka go’an tahay fulinta waajibaadkeeda sharci si siman oo aan cid gaar ah loo eegin.
Ilaa hadda, qareennada iyo qoyska Sacdiyo Bajaaj kama aysan bixin wax war rasmi ah oo ku saabsan eedeymaha loo jeediyay. Dhanka kale, xarigeeda ayaa sii kordhiyay doodda siyaasadeed ee u dhexeysa dowladda iyo mucaaradka, iyadoo qaar ka mid ah siyaasiyiinta mucaaradka ay dalbadeen in si degdeg ah xorriyadeeda dib loogu soo celiyo.
