Wararka24: Mucaaradka Soomaaliya ayaa shuruudo cad ku xiray gogoshii wadahadalka ee uu fidiyay Madaxweynaha Soomaaliya Xasan Sheekh Maxamuud, taas oo lagu wado in lagu dajiya xaaladda siyaasadeed ee dalka iyo arrimaha doorashooyinka.
Xildhibaan Cabdiladiif Muuse Nuur (Sanyare), oo kamid ah siyaasiyiinta mucaaradka, ayaa sheegay in mucaaradku diyaar u yihiin ka qeyb-galka shirka Golaha Mustaqbalka Soomaaliyeed, balse ay ku xireen saddex qodob oo ay ku tilmaameen kuwo aas-aasi ah.
Qodobada ay soo bandhigeen ayaa waxaa kamid ah in la joojiyo doorashooyinka ay ku tilmaameen sharci-darro ee ka socda dowlad-goboleedyada, in dib looga laabto wax-ka-beddelkii dastuurka ee dhowaan la ansixiyay, iyo in madaxweynaha uu caddeeyo inuusan sharci ahaan sii joogi karin xilka wixii ka dambeeya 15-ka May haddii aan dib loo dooran.
Shuruudahan ayaa kusoo baxay saacado un kadib markii Xasan Sheekh Maxamuud uu ku baaqay kulan Golaha Mustaqbalka Soomaaliyeed ah oo lagu balansan yahay 10-ka May, kaas oo dowladda sheegtay in looga hadlayo arrimaha siyasada ah ee dalka.
Bayaan kasoo baxay Villa Somalia ayaa lagu sheegay in kulanka uu salka ku hayo baahida loo qabo wadahadal furan, daah-furan iyo is-qancin siyaasadeed si xal loogu helo muranka doorashooyinka iyo jihada dowlad-dhiska.
Madaxweynaha ayaa ku adkeystay in dowladdiisu ay ka go’an tahay ilaalinta midnimada dalka, xoojinta dowladnimada iyo dhismaha hannaan siyaasadeed oo ku dhisan wadajir iyo is-afgarad.
Muran xooggan ayaa weli ka taagan hannaanka doorashada Soomaaliya, iyadoo mucaaradka iyo dowladda ay isku hayaan sharciyadda geeddi-socodka siyaasadeed iyo dastuurka. Dalka ayaa hadda ku wajahan sida ay dhinacyadu uga falcelin doonaan gogosha wada hadalka.
