Wararka24: Xarunta Madaxtooyada ee Villa Somalia waxaa xalay ka dhacay kulan xasaasi ah oo diiradda lagu saaray xaaladda siyaasadeed ee Koonfur Galbeed Soomaaliya, gaar ahaan isbeddelkii dhowaan ka dhacay magaalada Baydhaba.
Kulanka ayaa waxaa ka qeyb-galay Madaxweynaha Soomaaliya Xasan Sheekh Maxamuud, Ra’iisul Wasaaraha Xamza Cabdi Barre iyo Guddoomiyaha Golaha Shacabka Aadan Maxamed Nuur Madoobe, waxaana la sheegay inuu ku soo dhammaaday jawi deggan.
Sida ay wararku sheegayaan, kulanka waxaa sidoo kale ka qeyb-galay qaar ka mid ah siyaasiyiinta ka soo jeeda Digil iyo Mirifle, halka ay ka maqnaayeen xubno kale oo muhiim ah oo ka tirsan dowladda, taasoo muujinaysa kala duwanaansho aragtiyeed oo jira.
Ilo wareedyo lagu kalsoon yahay ayaa sheegaya in kulanka lagu go’aamiyay musharraxa ay dowladdu ku taageeri doonto doorashada Koonfur Galbeed, iyadoo la tilmaamay in Aadan Madoobe loo xushay inuu matalo Xisbiga Cadaaladda iyo Wadajirka.
Go’aankan ayaa la filayaa inuu dhaliyo dood iyo khilaaf gudaha ah, maadaama maalmahan uu jiray loollan siyaasadeed oo xooggan oo ku saabsan cidda hoggaamin doonta maamulka Koonfur Galbeed.
Dhanka kale, Villa Somalia ayaa dadaal xooggan ku bixinaysa dib-u-dhiska maamulka Koonfur Galbeed, kadib isbeddelkii ka dhacay Baydhaba, iyadoo la magacaabay hoggaan ku-meel-gaar ah oo sii wada howlaha maamulka.
Xaaladdan ayaa kusoo aadeysa xilli uu dalka wajahayo jahwareer siyaasadeed oo la xiriira doorashooyinka iyo wax ka beddelka dastuurka, taasoo sii kordhin karta xiisadaha u dhexeeya dowladda iyo mucaaradka
