Wasiirkii hore ee Arrimaha Dibadda Soomaaliya, Axmed Ciise Cawad, ayaa si adag uga falceliyey hadalkii uu Wasiirka Arrimaha Gudaha, Federaalka iyo Dib-u-heshiisiinta, Axmed Macallim Fiqi, u jeediyey mucaaradka.
Cawad ayaa sheegay in hadalka Wasiir Fiqi uusan waafaqsanayn masuuliyad wasiirnimo, isla markaana wasiirku aanu u kala dhawayn karin dhinacyada siyaasadeed ee kala aragti duwan. Wuxuu xusay in Wasiir Fiqi uu xilka u hayo guud ahaan shacabka Soomaaliyeed, balse uusan ku koobnayn muran siyaasadeed oo gaar ah.
“Wasiir Fiqi wuxuu wasiir u yahay dhammaan shacabka Soomaaliyeed. Fahamka dawladda ayaa ka khaldan. Uma taalo inuu muran la galo mucaarad ama mas’uul gaar ah sida Siciid Deni,” ayuu yiri Cawad.
Isagoo hadalka sii wata ayuu si gaar ah u dhaliilay siyaasiyiin uu sheegay inaysan ka tarjumayn masuuliyad dhab ah, isagoo magacyadooda ku sheegay Fiqi, Sanbaloolshe, Faysal Cali Waraabe iyo Juxa. “Raggaas waxaan u aqaan kuwo aan masuul ahayn oo aan garanayn masuuliyadooda. Haddii aan dib u eegno asalkooda siyaasadeed, waxay u badan tahay inaysan si dhab ah u garanayn waxa ay ka hadlayaan,” ayuu raaciyay.
Hadalka Cawad ayaa yimid xilli dood siyaasadeed ay ka dhex taagan tahay dowladda federaalka iyo hoggaamiyeyaasha mucaaradka, iyadoo hadallo kulul ay dhinacyadu isku marinayaan warbaahinta iyo baraha bulshada.
