Wararka24: Wasiirka Arrimaha Dibadda iyo Iskaashiga Caalamiga ah ee Soomaaliya, Cabdisalaam Cabdi Cali, ayaa gaaray magaalada Addis Ababa ee dalka Itoobiya si uu uga qeyb galo Kalfadhiga 49-aad ee Golaha Fulinta Midowga Afrika.
Shirkan ayaa diiradda lagu saaraya arrimo ay ka mid yihiin nabadda iyo amniga qaaradda, dib-u-habaynta hay’adaha Midowga Afrika, xoojinta isdhexgalka dhaqaalaha dalalka Afrika iyo dardargelinta iskaashiga u dhexeeya dowladaha xubnaha ka ah ururka.
Markii uu gaaray Addis Ababa, Wasiirka waxaa si rasmi ah u soo dhaweeyay mas’uuliyiin ka tirsan Wasaaradda Arrimaha Dibadda ee Itoobiya, taas oo ka tarjumaysa xiriirka diblomaasiyadeed iyo iskaashiga u dhexeeya Soomaaliya iyo Itoobiya.
Inta uu shirka socdo, Soomaaliya ayaa la filayaa inay soo bandhigto mudnaanteeda ku aaddan xoojinta iskaashiga amniga, horumarinta maamulka badaha iyo taageeridda dadaallada lagu xaqiijinayo nabadda iyo xasilloonida gobolka.
Sidoo kale, Wasiir Cabdisalaam Cabdi Cali ayaa la filayaa inuu kulamo la yeesho dhiggiisa dalalka kale ee Afrika, si ay uga wada hadlaan la dagaallanka khataraha ka gudba xuduudaha, xoojinta awoodda Midowga Afrika ee ka hortagga colaadaha iyo kobcinta iskaashiga dhaqaale ee Geeska Afrika.
Kalfadhiga 49-aad ee Golaha Fulinta Midowga Afrika ayaa la filayaa in laga soo saaro go’aanno la xiriira ajandayaasha muhiimka ah ee ururka, kuwaas oo saameyn ku yeelan doona iskaashiga siyaasadeed, amni iyo horumarineed ee dalalka xubnaha ka ah Midowga Afrika.
