Warar ay baahiyeen warbaahinno caalami ah ayaa sheegaya in dalalka Saudi Arabia iyo United Arab Emirates ay weeraro qarsoodi ah ku qaadeen gudaha Iran intii uu socday dagaalka ka aloosan Bariga Dhexe.
Sida lagu sheegay warbixinno laga soo xigtay saraakiil reer Galbeed ah iyo ilo Iiraaniyiin ah, duqeymaha ayaa la sheegay inay ahaayeen jawaab looga falcelinayay weeraro hore oo Iiraan ay ku qaaday dalalka Khaliijka, gaar ahaan Sacuudi Carabiya.
Wararka ayaa tilmaamay in duqeymahaasi ay dhaceen dabayaaqadii bishii Maarso, inkastoo aan si rasmi ah loo shaacin goobaha lagu bartilmaameedsaday gudaha Iiraan. Dowladda Sacuudiga iyo dowladda Iiraan ayaan si toos ah uga hadlin jiritaanka weeraradan.
Wargeyska Reuters ayaa sheegay inuusan si madax-bannaan u xaqiijin karin goobaha la duqeeyay ama khasaaraha ka dhashay weeraradaasi. Sidoo kale warbaahinta The Wall Street Journal ayaa sheegtay in Imaaraadka Carabta uu isna fuliyay weeraro ka dhan ah Iiraan.
Xiisadda gobolka ayaa sii korortay kadib dagaal la sheegay inuu billowday dhammaadkii bishii Febraayo, markaas oo Mareykanka iyo Israa’iil ay weeraro ku qaadeen gudaha Iiraan. Tan iyo markaas, Iiraan ayaa lagu eedeeyay inay gantaallo iyo diyaarado drone ah ku weerartay dalal kamid ah Khaliijka.
Wararka ayaa sidoo kale sheegaya in dadaallo diblomaasiyadeed ay socdeen si loo dejiyo xiisadda u dhexeysa Sacuudiga iyo Iiraan. Ilo wareedyo ayaa sheegay in labada dal ay yeesheen wada-hadallo hoose oo looga gol lahaa in laga hortago dagaal ballaaran oo gobolka ka qarxa.
Sacuudi Carabiya iyo Iiraan ayaa sanadihii dambe dib u soo celiyay xiriirkooda diblomaasiyadeed kadib heshiis ay dhexdhexaadisay dowladda China sanadkii 2023. Heshiiskaasi ayaa qayb ka ahaa dadaallo lagu yareynayay xiisadaha gobolka.
Khubarada siyaasadda gobolka ayaa ka digaya in sii socoshada weerarada iyo colaadaha ay khatar ku yihiin amniga Bariga Dhexe iyo dhaqaalaha caalamka, gaar ahaan isu socodka shidaalka iyo ganacsiga caalamiga ah.
