Wararka24: Wasiirka Shaqada iyo Arrimaha Bulshada ee Dowladda Federaalka Soomaaliya, Prof. Saalim Caliyow, ayaa maanta xafiiskiisa ku qaabilay wafdi heer sare ah oo ka socday Urur-goboleedka IGAD, kuwaas oo booqasho shaqo ku jooga magaalada Muqdisho.
Kulanka ayaa diiradda lagu saaray xoojinta iskaashiga u dhexeeya Dowladda Federaalka Soomaaliya iyo IGAD, gaar ahaan dhinacyada shaqada, socdaalka shaqaalaha iyo isdhexgalka dalalka gobolka. Labada dhinac ayaa sidoo kale ka wada hadlay sidii loo dardargelin lahaa hirgelinta Baratakoolka Xorriyadda Isu-socodka Dadka ee Gobolka IGAD.
Intii uu socday kulanka, waxaa si gaar ah looga hadlay horumarinta maamulka socdaalka shaqaalaha, fududeynta isu-socodka sharciyeysan ee shaqaalaha, ilaalinta xuquuqda shaqaalaha iyo abuurista fursado shaqo oo gacan ka geysan kara koboca dhaqaalaha iyo xoojinta isdhexgalka bulshada ee gobolka.
Wasiir Prof. Saalim Caliyow ayaa uga mahadceliyay wafdiga IGAD booqashadooda iyo taageerada ay siiyaan Soomaaliya. Wuxuu caddeeyay in wasaaraddu ay ka go’an tahay xoojinta iskaashiga ay la leedahay IGAD iyo Hay’adda Shaqada Adduunka (ILO), si loo hirgeliyo siyaasado iyo barnaamijyo lagu horumarinayo suuqa shaqada.
Wasiirka ayaa sidoo kale sheegay in iskaashigan uu door muhiim ah ka qaadan doono kor u qaadista shaqo-abuurka, fududeynta socdaalka shaqaalaha iyo taageeridda horumar waara oo ay ka faa’iideystaan muwaadiniinta Soomaaliyeed.
Kulankan ayaa qeyb ka ah dadaallada ay Dowladda Federaalka Soomaaliya ku xoojinayso iskaashiga heer gobol iyo heer caalami, iyadoo la doonayo in la horumariyo suuqa shaqada, la ilaaliyo xuquuqda shaqaalaha, isla markaana la abuuro fursado dhaqaale oo cusub oo u adeegaya horumarka dalka.
