Muqdisho – Dowladda Uganda ayaa ku dhawaaqday in ciidamadeeda ku sugan howlgalka ATMIS ay howlgal ka fuliyay gobolka Shabeellaha Hoose ku dileen horjooge sare oo ka tirsan ururka Al-Shabaab.
War-saxaafadeed ka soo baxay militariga Uganda ayaa lagu sheegay in howlgalkaasi lagu bartilmaameedsaday xubno ka tirsan Al-Shabaab, islamarkaana lagu dilay hoggaamiye sare oo kooxda ka tirsanaa, inkastoo aan weli si faahfaahsan loo shaacin magaca horjoogaha la beegsaday.
Saraakiisha Uganda ayaa tilmaamay in weerarka uu qeyb ka yahay howlgalada joogtada ah ee lagu xaqiijinayo amniga, lana doonayo in lagu wiiqo awoodda Al-Shabaab ee gobolka Shabeellaha Hoose.
Illaa iyo hadda dowladda Soomaaliya iyo ATMIS ma aysan soo saarin war rasmi ah oo faahfaahin dheeraad ah ka bixinaya howlgalka iyo khasaaraha rasmiga ah ee ka dhashay.
Sheegashada Uganda ayaa timid xilli ay socdaan dadaallo xooggan oo lagu xoojinaayo dagaalka ka dhanka ah Al-Shabaab ee ka socda qaybo badan oo dalka ka mid ah.
