Wararka24: Madaxweynaha Mareykanka Donald Trump ayaa Khamiistii sheegay in Iiraan ay la kulmi doonto weerar culus haddii baaritaannadu xaqiijiyaan inay ku lug lahayd weerarkii lagu qaaday kabtanka diyaaradda Flydubai ee ku sii jeedday Tel Aviv.
Trump ayaa wariyeyaasha ugu sheegay Aqalka Cad in, iyadoo lagu saleynayo xogta uu maqlayo, uu u arko inay suuragal tahay in Iiraan ay ku lug leedahay dhacdada. Si kastaba, wuxuu sheegay in baaritaanku weli socdo oo aan mas’uuliyadda Tehran si rasmi ah loo xaqiijin.
“Waxaa lagu dhufan doono dharbaaxo aad u xooggan,” ayuu Trump yiri markii la weydiiyay tallaabada Mareykanka uu qaadi karo haddii Iiraan lagu helo inay ka dambeysay dhacdada. Hadalka Trump ayaa kusoo beegmay xilli mas’uuliyiinta Israa’iil iyo Imaaraadka ay baaritaanno kala duwan ka wadaan weerarka.
Dhacdadu waxay ka dhacday duullimaadkii Flydubai FZ1073 oo 30-kii Sebtembar ka baxay Dubai kuna sii jeeday Tel Aviv. Duuliye-ku-xigeenka diyaaradda ayaa lagu eedeeyay inuu weeraray Kabtan Smit Machchhar, taasoo diyaaradda ku keentay hoos-u-dhac aad u degdeg ah ka hor inta aysan rakaabka iyo shaqaaluhu faragelin.
Kabtan Machchhar, oo dhaawacmay, ayaa furay albaabka qolka duuliyaha, taasoo u saamaxday rakaabku inay gudaha galaan oo ay xakameeyaan weeraryahanka. Shaqaale kale oo duulimaadka saarnaa ayaa markii dambe la wareegay diyaaradda, waxaana si nabad ah loogu dejiyay Tabuk ee Sacuudiga. Diyaaraddu waxay sidday in ka badan 170 qof.
Ra’iisul Wasaaraha Israa’iil Benjamin Netanyahu ayaa sheegay in baaritaannada ay muujinayaan in duuliye-ku-xigeenku uu qaatay fikrado uu ku tilmaamay xagjirnimo Islaami ah, balse wuxuu sidoo kale sheegay inay goor hore tahay in la xaqiijiyo haddii Iiraan ay ku lug lahayd. Imaaraadka Carabta ayaa isaguna baaritaan ka wada in dhacdadu lahayd xiriir argagixisanimo.
Ilaa hadda ma jirto caddeyn dadweyne oo rasmi ah oo xaqiijinaysa in dowladda Iiraan ay ku lug lahayd weerarka. Baaritaannada ay wadaan Imaaraadka, Sacuudiga iyo Israa’iil ayaa weli socda, iyadoo duuliye-ku-xigeenka lagu hayo xabsi inta baaritaanka lagu guda jiro.
Flydubai ayaa hakisay duullimaadyadii u dhexeeyay Dubai iyo Israa’iil kadib dhacdada, halka shirkadaha diyaaradaha Israa’iil ay qaadeen tallaabooyin lagu soo celinayo rakaabkii ku xayirmay Dubai.
