Wararka24: Ra’iisul Wasaaraha Israa’iil Benjamin Netanyahu ayaa sheegay in baaritaannada hordhaca ah ay muujinayaan in duuliye-ku-xigeenkii lagu eedeeyay inuu weeraray kabtanka diyaaradda Flydubai uu lahaa fikrado uu ku tilmaamay “xagjirnimo Islaami ah”. Si kastaba, Netanyahu wuxuu carrabka ku adkeeyay in baaritaanka weli socdo, isla markaana aan la gaarin gunaanad rasmi ah oo ku saabsan sababta weerarka.
Dhacdadu waxay dhacday Arbacadii, xilli diyaaradda Flydubai ee FZ1073 ay ka duushay Dubai kuna sii jeedayTel Aviv. Duuliye-ku-xigeenka, oo Israa’iil ku sheegtay inuu yahay muwaadin Cumaani ah, ayaa lagu eedeeyay inuu weeraray Kabtan Smit Machchhar, taasoo diyaaradda ku keentay hoos-u-dhac degdeg ah. Diyaaradda ayaa markii dambe si nabad ah ugu degtay Tabuk ee Sacuudiga.
Netanyahu ayaa Fox News u sheegay in ay u muuqato in weeraryahanku uu doonayay inuu diyaaradda burburiyo, balse uu sheegay inuusan weli doonayn inuu arrintaas ka dhigo gunaanad kama dambeys ah. Wuxuu sidoo kale sheegay in ay weli tahay goor hore in la xaqiijiyo haddii weerarku xiriir la lahaa Iiraan ama cid kale.
Dowladda Imaaraadka Carabta oo baaritaan ku wada duruufaha iyo ujeeddada dhacdada
Dowladda Imaaraadka Carabta ayaa iyaduna bilowday baaritaan lagu ogaanayo duruufaha iyo ujeeddada dhacdada, oo ay ku jirto in ay xiriir la lahayd fal argagixiso ama qorshe hore loo sii diyaariyay. Mas’uuliyiinta Israa’iil ayaa sidoo kale baaritaan ku wada kiiska, halka Sacuudigu uu sameeyay baaritaanno hordhac ah kadib markii diyaaradda si degdeg ah ugu degtay Tabuk.
Dhacdada ayaa dhacday kadib markii Kabtan Machchhar uu dhaawacmay, balse uu furay albaabka qolka duuliyaha, taasoo rakaab iyo shaqaale u saamaxday inay gudaha galaan oo ay xakameeyaan duuliye-ku-xigeenka. Laba duuliye oo kale oo diyaaradda saarnaa ayaa markii dambe gacan ka geystay in diyaaradda si nabad ah loo dejiyo.
Netanyahu iyo Ra’iisul Wasaaraha Hindiya Narendra Modi ayaa Machchhar ku ammaanay doorkiisa dhacdada. Safaaradda Hindiya ee Imaaraadka ayaa sheegtay in kabtanku si wanaagsan uga soo kabanayo dhaawacyadii soo gaaray.
Flydubai ayaa hakisay duullimaadyadii u dhexeeyay Dubai iyo Tel Aviv iyadoo baaritaanno lagu sameynayo dhacdada. Dhanka kale, shirkadaha diyaaradaha Israa’iil ayaa qorsheynaya duullimaadyo lagu soo celinayo rakaabkii ku xayirmay Dubai, iyadoo tallaabooyin dheeraad ah oo amni lagu sameynayo duuliyeyaasha u kala goosha Israa’iil iyo dalalka kale.
