Wararka24: Bulshada Soomaalida ee ku nool gobolka Minnesota ayaa weli wajahaya cabsi iyo walaac la xiriira howlgalada socdaalka ee ay fuliyaan saraakiisha dowladda Maraykanka. Inkastoo la sheegay in la dhimay howlgaladii waaweynaa ee hore uga socday gobolkaasi, haddana dad badan ayaa sheegay in xaalad cabsi iyo hubanti la’aan ay wali taagan tahay.
Howlgalada ay wadaan ciidamada socdaalka ee ICE ayaa si gaar ah looga dareemay magaalada Minneapolis, halkaas oo ay ku nool yihiin Soomaali badan. Dadka deegaanka qaarkood ayaa sheegay in wali ay jiraan baaritaanno iyo qabqabashooyin lagu sameynayo guryaha iyo goobaha shaqada.
Cabdi oo ah wiil Soomaali ah oo 23 jir ah, magaciisana loo beddelay sababo amni awgood ayaa sheegay inuu ku nool yahay xaalad cabsi leh. Wuxuu sheegay inuusan hal meel ku nagaan muddo dheer, isla markaana uu ka baqayo in saraakiisha socdaalka ay mar kasta u yimaadaan.
Cabdi ayaa sidoo kale sheegay in qaar kamid ah saaxiibbadiis la xiray inkastoo ay haysteen TPS, oo ah sharci ku meel gaar ah oo u oggolaanaya dadka kasoo jeeda dalalka colaadaha ka jiraan inay si sharci ah ugu noolaadaan una shaqeeyaan Maraykanka. Dowladda Maraykanka ayaa hore u dooneysay inay joojiso TPS-ka Soomaalida, balse maxkamad federaal ah ayaa si ku meel gaar ah u hakisay qorshahaasi.
Maamulka Donald Trump ayaa hore ugu dooday in xaaladda amni ee Soomaaliya ay reysaneyso, taas oo sabab looga dhigay qorshaha lagu joojinayay TPS-ka. Arrintaasi ayaa walaac xooggan ku abuurtay Soomaalida ku nool gudaha Maraykanka.
Qiyaastii 260,000 oo qof oo asal ahaan Soomaali ah ayaa ku nool Maraykanka, iyadoo intooda badan ay halkaasi tageen kadib burburkii dowladdii Soomaaliya sanadkii 1991. Dad badan ayaa weli ka baqaya masaafurin ama xarig la xiriira xaaladdooda socdaal.
Cabdi ayaa sheegay in inkastoo uu hadda si sharci ah ugu nool yahay Maraykanka, haddana aanu diyaar u ahayn inuu dib ugu laabto Soomaaliya, isagoo xusay cabsi amni iyo xaaladaha adag ee dalka ka jira.
