Wararka24: Bulshada Soomaaliyeed ee ku nool Mareykanka ayaa muujisay walaac isa soo taraya kadib go’aan ay 25-kii Juun gaartay Maxkamadda Sare ee Mareykanka, kaas oo u oggolaanaya maamulka Madaxweyne Donald Trump inuu sii wado dadaallada lagu joojinayo barnaamijka Temporary Protected Status (TPS) ee dadka ka soo jeeda Haiti iyo Suuriya.
Inkasta oo go’aankaasi aanu si toos ah u saameynayn Soomaalida ka faa’iidaysata TPS, haddana waxaa sare u kacay cabsi laga qabo in mustaqbalka tallaabooyin la mid ah lagu soo rogo muwaadiniinta Soomaaliyeed ee ku nool Mareykanka.
TPS waa barnaamij ku meel gaar ah oo u saamaxa dadka ka soo jeeda dalalka ay colaadaha ama xaaladaha adag ka jiraan inay ku noolaadaan kana shaqeystaan Mareykanka. Barnaamijku ma bixiyo deganaansho rasmi ah, balse wuxuu dadka ka ilaaliyaa in dalka laga saaro inta uu shaqeynayo.
Wararka ayaa sheegaya in ku dhowaad 1.3 milyan oo qof ay guud ahaan ku jiraan nidaamka TPS ee Mareykanka, waxaana ka mid ah kumannaan Soomaali ah oo deggen gobollo kala duwan, gaar ahaan Ohio oo ay ku nool yihiin bulsho Soomaaliyeed oo ballaaran.
Hoggaamiyeyaasha bulshada Soomaaliyeed ayaa sheegay in go’aanka maxkamaddu uu kordhiyay walaaca qoysas badan oo sannado ku noolaa Mareykanka, halkaas oo ay ka sameysteen nolol, shaqooyin iyo qoysas.
Waxay sheegeen in cabsida laga qabo in barnaamijku mustaqbalka isbeddel ku yimaado ay saameyn ku yeelatay xaaladda nafsiyeed ee dad badan, iyadoo la soo sheegay inay kordheen walaaca, hurdo la’aanta iyo niyad-jabka.
Khubarada socdaalka ayaa xusay in haddii TPS la joojiyo aysan taasi si toos ah u keenayn masaafurin degdeg ah, balse ay saameyn karto rukhsadaha shaqada, laysinnada gaadiidka iyo awoodda qoysaska ay ugu maareyn karaan noloshooda maalinlaha ah.
Bulshada Soomaaliyeed ee Mareykanka ayaa weli si dhow ula socota horumarka la xiriira siyaasadaha socdaalka, iyagoo ka walaacsan waxa mustaqbalka ku soo kordhi kara barnaamijka TPS.
