Wararka24: Dowladda Federaalka Soomaaliya ayaa si rasmi ah u soo dhoweysay isfahamka ay gaareen Mareykanka iyo Iiraan, iyadoo ku tilmaantay tallaabo muhiim ah oo kor u qaadi karta xasilloonida gobolka Bariga Dhexe iyo yareynta xiisadaha muddada dheer ka jiray halkaasi.
War-saxaafadeed kasoo baxay Wasaaradda Arrimaha Dibadda Soomaaliya ayaa lagu sheegay in dowladda ay taageersan tahay xalalka lagu gaaro wada-hadal iyo diblomaasiyad, halkii loo adeegsan lahaa iska horimaadyo militari. Dowladda ayaa xustay in wadahadalku yahay waddada ugu habboon ee lagu xallin karo khilaafaadka caalamiga ah.
Soomaaliya ayaa sidoo kale bogaadisay dadaallada ay sameeyeen dalal dhowr ah oo door ka qaatay dhiirrigelinta heshiiska, kuwaas oo ay ka mid yihiin Pakistan, Qatar, Masar, Sacuudiga iyo Turkiga. Dowladda ayaa tilmaantay in dadaalladaasi ay gacan ka geysteen abuurista jawi horseeday isfahamka labada dhinac.
War-saxaafadeedka ayaa si gaar ah u xusay doorka Madaxweynaha Mareykanka Donald Trump, iyadoo lagu ammaanay dadaallada uu ku hormarinayo heshiiska iyo tallaabooyinka lagu dejinayo colaadaha gobolka. Dowladda Soomaaliya ayaa sheegtay in dadaallada noocaas ah ay muhiim u yihiin xoojinta nabadda iyo amniga caalamiga ah.
Sidoo kale, Muqdisho ayaa muujisay rajada ay ka qabto in isfahamkan uu horseedo amni waara, ilaalinta marin-biyoodka caalamiga ah iyo kobcinta iskaashiga u dhexeeya dalalka gobolka. Dowladda ayaa xustay in xasilloonida Bariga Dhexe ay saameyn togan ku yeelan karto amniga iyo dhaqaalaha caalamka.
Dhammaadka bayaanka, Soomaaliya ayaa ku celisay mowqifkeeda ku aaddan in khilaafaadka lagu xalliyo wada-hadal, ixtiraamka sharciga caalamiga ah iyo iskaashi diblomaasiyadeed. Waxay sidoo kale ugu baaqday dhammaan dhinacyada inay sii wadaan dadaallada lagu xoojinayo nabadda iyo wada noolaanshaha.
