Wararka24: Maamulka Somaliland ayaa ku dhawaaqay amar cusub oo la xiriira dadka ajaanibta ah ee sida sharci-darrada ah ku jooga deegaannadeeda. Dowladda ayaa sheegtay in dhammaan dadka aan haysan sharciyada lagama maarmaanka ah looga baahan yahay inay muddo toban maalmood gudahood ah kaga baxaan deegaannada Somaliland.
Go’aankan waxaa shaaciyay Wasiir-u-dawlaha Wasaaradda Arrimaha Gudaha Somaliland, Cabdirashiid Maxamed Axmed (Magaalo), oo sheegay in hay’adaha ammaanka loo xilsaaray fulinta qorshahan. Wuxuu xusay in laamaha ammaanka ay si taxaddar leh u maamuli doonaan howlaha la xiriira dadka aan haysan sharciyada lagama maarmaanka ah.
Wasiirka ayaa sheegay in tallaabadan looga gol leeyahay xoojinta amniga iyo ilaalinta xasilloonida. Wuxuu sidoo kale shacabka ugu baaqay inay laamaha ammaanka ku wargeliyaan cid kasta oo looga shakiyo inay si sharci-darro ah ku joogto deegaannada Somaliland.
Sida uu maamulka Somaliland sheegay, dadka aan kasoo jeedin deegaannadeeda waxaa loo aqoonsan karaa ajaanib marka la eego nidaamka socdaalka iyo sharciyada maamulka. Dowladda ayaa tilmaantay in dadka sida sharciga ah ku jooga Somaliland aysan saameyn doonin tallaabadan cusub.
Cabdirashiid Maxamed Axmed ayaa sheegay in Somaliland ay wajahayso marxalad cusub oo ay ku kordhayaan fursadaha maalgashi iyo xiriirrada dibadda. Sida uu sheegay, arrintaasi waxay muhiim ka dhigeysaa in la xoojiyo nidaamyada amniga iyo maamulka socdaalka.
Dhanka kale, maamulka Somaliland ayaa carrabka ku adkeeyay in shacabka aanay gacantooda ku qaadan fulinta sharciga. Dowladda ayaa sheegtay in kormeerka, diiwaangelinta iyo tallaabooyinka la xiriira dadka ajaanibta ah ay si gaar ah ugu xilsaaran yihiin hay’adaha dowladda iyo waaxyaha socdaalka.
Somaliland ayaa hore dhowr jeer u soo saartay awaamiir la xiriira dadka aan haysan sharciyada deganaanshaha. Qaar kamid ah dadkaasi ayaa la siiyay fursad ay ku sharciyeystaan joogitaankooda, halka kuwo kale laga dalbaday inay waafajiyaan shuruucda socdaalka ama ay ka baxaan deegaannada maamulka.
DAAWO
