Wararka24: Dowladda Federaalka Soomaaliya iyo siyaasiyiinta mucaaradka ee ku mideysan Golaha Mustaqbalka Soomaaliyeed ayaa maanta magaalada Muqdisho ku yeelanaya shir muhiim ah oo diiradda lagu saarayo arrimaha siyaasadda iyo hannaanka doorashooyinka dalka.
Kulankan ayaa waxaa fududeynaya wakiillo ka socda dowladda Turkiga, waxaana la filayaa in dhinacyadu ay ka wada hadlaan qodobbo muddooyinkii dambe saldhig u ahaa khilaafka siyaasadeed ee u dhexeeya dowladda iyo mucaaradka.
Wararka la helayo ayaa sheegaya in xubnaha mucaaradka ay soo bandhigi doonaan aragtiyo cusub oo ku saabsan nooca doorasho ee xilligan dalka ka qabsoomi karta, iyadoo ay hore u muujiyeen diidmo ku aaddan qorshaha doorashooyinka qof iyo codka ah ee ay dowladda federaalku waddo.
Saacadihii lasoo dhaafay waxaa magaalada ka socday kulamo hordhac ah oo ay yeesheen mas’uuliyiin ka kala tirsan labada dhinac, kuwaas oo lagu falanqeeyay ajendaha shirka, qodobada miiska saaran iyo habka loo wajihi karo doodaha la filayo inay kasoo baxaan wada-hadallada.
Ilo xog-ogaal ah ayaa tilmaamaya in mucaaradku dib u eegis ku sameeyay qaar kamid ah mowqifyadoodii hore, isla markaana ay diyaariyeen hindise siyaasadeed oo la xiriira geeddi-socodka doorashooyinka, kaas oo ay u arkaan mid dalka ka hirgeli kara xaaladaha jira.
Dhinaca kale, wafdiga Turkiga ee ka qeyb qaadanaya dadaallada dhex-dhexaadinta ayaa kulamo gaar gaar ah la yeeshay dhinacyada siyaasadda, si loo abuuro jawi ku habboon wada-hadallada iyo in la helo is-afgarad lagu xallin karo muranka taagan.
Kulankan ayaa kusoo aadaya xilli Soomaaliya ay wajahayso marxalad siyaasadeed oo xasaasi ah, waxaana si weyn indhaha loogu hayaa natiijada kasoo baxda wada-hadalladan, maadaama ay saameyn ku yeelan karaan jihada siyaasadeed ee dalka iyo hannaanka doorashooyinka ee lagu heshiin karo.
