Wararka24: Saraakiil sare oo Israa’iili ah ayaa qiray in qorshihii lagu wiiqi lahaa ama lagu ridi lahaa nidaamka talada haya ee Iiraan uusan weli guul gaarin, iyadoo hoggaanka Tehran uu weli gacanta ku hayo maamulka dalka.
Warbixin uu daabacay wargeyska The Wall Street Journal ayaa sheegtay in ku dhowaad laba toddobaad kadib markii uu dagaalka qarxay, nidaamka Iiraan uu weli shaqeynayo, isla markaana ciidamada ammaanka ay si adag u xakameeyeen xaaladda gudaha.
Ra’iisul Wasaaraha Israa’iil Benjamin Netanyahu ayaa sheegay inuusan hubin in shacabka Iiraan ay awoodi doonaan inay ridaan nidaamka talada haya, inkasta oo uu xusay in Israa’iil ay doonayso inay abuuro xaalad u sahasha shacabka inay isbeddel sameeyaan.
Dhanka milatariga Israa’iil ayaa sheegay in hadafka ugu weyn ee hawlgallada uu yahay wiiqidda awoodda milatari ee Iiraan, gaar ahaan barnaamijyada gantaallada iyo awoodaha kale ee khatarta ku ah Israa’iil iyo gobolka.
Dhinaca kale, nidaamka Tehran ayaa sii wada weeraro aargoosi ah oo saameyn ku yeeshay gobolka iyo suuqyada caalamka, iyadoo xiisadda ka taagan marinnada muhiimka ah ee badda ay weli sare u kacayso.
Khubaro istaraatiiji ah ayaa sheegay in isbeddel ku yimaada nidaamka Iiraan uu noqon karo mid waqti dheer qaata, isla markaana aan lagu gaari karin hawlgallo militari oo keliya.
