Kuala Lumpur – Ra’iisul Wasaaraha Malaysia, Anwar Ibrahim, ayaa si adag u cambaareeyay weerarkii Israa’iil ku qaaday magaalada Dooxa, isagoo ku tilmaamay weerar aan kaliya lagu bartilmaameedsan Qatar balse guud ahaan dunida Muslimka oo dhan.
Anwar ayaa sheegay in weerarkaasi uu ahaa isku day lagu burburinayo dadaallada nabadeed ee Qatar hormuudka ka tahay, isla markaana uu yahay jebin cad oo ka dhan ah shuruucda caalamiga ah. Wuxuu si gaar ah u dhaleeceeyay hadalladii Ra’iisul Wasaaraha Israa’iil, Benjamin Netanyahu, ee ka dhanka ahaa dowladnimada Falastiin, isagoo ku tilmaamay kuwo cunsuriyad joogto ah ka tarjumaya.
Ra’iisul Wasaaraha Malaysia ayaa ugu baaqay dalalka Muslimka inay ka gudbaan cambaareynta afka kaliya, islamarkaana ay qaadaan tallaabooyin dhab ah oo ay ku joojinayaan xidhiidhka diblomaasiyadeed iyo ganacsi ee ay la leeyihiin Israa’iil. Wuxuu carrabka ku adkeeyay in xaaladda hadda taagan ay u baahan tahay ficil iyo geesinimo, halkii lagu ekaan lahaa hadal aan waxba ka beddelin xadgudubyada socda.
