Wararka24: Ra’iisul Wasaaraha Xukuumadda Federaalka Soomaaliya, Xamsa Cabdi Barre, ayaa magacaabay Guddiga Qabanqaabada Maalmaha Xorriyadda iyo Midnimada ee sanad-guuradii 66-aad ee xuska 26-ka Juun iyo 1-da Luulyo.
Guddigan ayaa loo xilsaaray diyaarinta, isku-dubbaridka iyo hirgelinta munaasabadaha lagu xusayo maalmaha taariikhiga ah ee xorriyadda iyo midnimada Soomaaliya. Sidoo kale, guddigu wuxuu mas’uul ka noqon doonaa isku xirka hay’adaha dowladda, maamulka kharashaadka ku baxaya xuska, abaabulka munaasabadaha kala duwan iyo sugidda amniga goobaha lagu qabanayo xafladaha.
Guddoomiyaha guddiga ayaa loo magacaabay Wasiirka Arrimaha Dibadda, Cali Yuusuf Cali (Xoosh), halka xubnaha kale ay ka mid yihiin wasiirro, wasiiru-dowlayaal iyo mas’uuliyiin sare oo ka tirsan dowladda Federaalka.
Xubnaha guddiga waxaa kamid ah Bashiir Maxamed Jaamac, Maxamed Cabdi Xayir, Khadiijo Maxamed Al-Makhzuumi, Xasan Xuseen Maxamed, Axmed Macalin Fiqi iyo xubno kale oo ka tirsan golaha xukuumadda.
Ra’iisul Wasaaraha ayaa guddiga faray inay si dhow uga shaqeeyaan diyaarinta munaasabadaha xuska maalmaha xorriyadda iyo midnimada, si loo muujiyo qiimaha taariikheed ee maalmahan muhiimka ah.
Sidoo kale, wuxuu carrabka ku adkeeyay in munaasabadaha sanadkan ay door ka qaataan xoojinta dareenka waddaniyadda, midnimada iyo wadajirka shacabka Soomaaliyeed, iyadoo la xusayo halgankii iyo dadaalladii horseeday xorriyadda iyo mideynta dalka.
Maalmaha 26-ka Juun iyo 1-da Luulyo ayaa ka mid ah maalmaha ugu muhiimsan taariikhda Soomaaliya, waxaana sanad kasta lagu xusaa munaasabado lagu muujiyo qiimaha xorriyadda, midnimada iyo dowladnimada Soomaaliyeed.
