Ra’iisul Wasaaraha Xukuumadda Federaalka Soomaaliya, Mudane Xamsa Cabdi Barre, ayaa maanta xafiiskiisa ku qaabilay Ku-xigeenka Agaasimaha Guud ee Hawlgallada Hey’adda Caalamiga ah ee Socdaalka (IOM), Marwo Ugochi Daniels. Kulankooda ayaa diiradda lagu saaray xoojinta iskaashiga iyo dardargelinta barnaamijyada horumarineed ee IOM ay ka waddo Soomaaliya.
Labada dhinac ayaa ka wada hadlay sidii loo waafajin lahaa howlaha hey’addu ka waddo gudaha dalka iyo Qorshaha Isbeddelka Qaranka (NTP 2025–2029), si loo gaaro ujeedooyin mideysan oo waxtar u leh shacabka Soomaaliyeed. Ra’iisul Wasaare Xamsa ayaa uga mahadceliyey IOM kaalinta ay ka qaadato taageerada dib-u-dhiska dalka, isaga oo xusay in ay muhiim tahay in la sii xoojiyo fulinta mashaariicda wax-ku-oolka ah.
Dhankeeda, Marwo Ugochi Daniels ayaa carrabka ku adkeysay sida IOM ay uga go’an tahay inay sii waddo taageerada ay siiso Soomaaliya, iyadoo xustay in heyaddu ay diyaar u tahay inay la shaqeyso dowladda si loo xaqiijiyo horumarka iyo xasilloonida dalka.
