Wararka24: Pakistan ayaa Sacuudi Carabiya u dirtay ku dhowaad 8,000 oo askari, diyaarado dagaal iyo nidaamka difaaca cirka oo uu sameeyay Shiinaha, iyadoo la fulinayo heshiis difaac oo ay labada dal kala saxiixdeen sanadkii hore.
Sida ay qortay Reuters, dhaq-dhaqaaqan militari ayaa billowday horraantii bishii Abriil, wuxuuna kusoo aadayaa xilli ay sii kordhayaan xiisadaha Bariga Dhexe kadib dagaalladii u dhexeeyay Mareykanka, Israa’iil iyo Iran.
Pakistan ayaa Sacuudiga geysay guuto ka kooban diyaaradaha dagaalka nooca JF-17 Thunder oo ay si wadajir ah u sameeyaan Pakistan iyo Shiinaha. Waxa kale oo Riyadh la geeyay nidaamka difaaca cirka ee HQ-9, kaas oo kamid ah qalabka difaaca casriga ah ee Shiinaha.
Tallaabadan ayaa Sacuudiga ka dhigeysa meel ay isku mar ka wada shaqeynayaan nidaamyada difaaca cirka ee Mareykanka iyo Shiinaha, maadaama boqortooyadu horey u haysatay nidaamyada Patriot iyo THAAD.
Heshiiska difaac ee labada dal ayaa la saxiixay bishii Sebtember 2025, waxaana lagu heshiiyay in weerar lagu qaado mid kamid ah labada dal loo arko weerar ka dhan ah labadooda. Heshiiskan ayaa helay muhiimad dheeraad ah kadib markii Iran ay weerarro ku qaaday dalal Khaliijka ku yaalla.
Wararka ayaa sheegaya in heshiiska cusub uu suuragal ka dhigayo in mustaqbalka Sacuudiga loo diro ilaa 80,000 oo askari oo Pakistani ah haddii xaaladda amniga gobolka ay sii xumaato. Waxaa sidoo kale jira qorshe ku saabsan in maraakiib dagaal oo Pakistani ah la geeyo boqortooyada.
Xiisadaha gobolka ayaa si gaar ah diiradda u saaraya marin-biyoodka muhiimka ah ee marinka Hormuz iyo Bab el-Mandeb, kuwaas oo muhiim u ah ganacsiga caalamiga ah iyo dhoofinta shidaalka.
Pakistan iyo Sacuudiga ayaa muddo dheer lahaa xiriir dhow oo dhinacyada amniga iyo dhaqaalaha ah, balse dhaq-dhaqaaqan cusub ayaa muujinaya in Riyadh ay dhiseyso istaraatiijiyad amni oo ka ballaaran tii hore, iyadoo isku dayeysa inay yareyso ku tiirsanaanta keliya ee ay ku qabto Mareykanka.
