Wararka24: Dowladda Pakistan ayaa sheegtay inay xiriir toos ah la sameysay Dowladda Federaalka Soomaaliya, kadib markii burcad-badeed hubeysan ay xeebaha Soomaaliya ka afduubeen markab shidaal siday, kaas oo ay saarnaayeen 11 muwaadin oo Pakistani ah iyo kabtan u dhashay Indonesia.
Wasaaradda Arrimaha Dibadda Pakistan ayaa xaqiijisay in wada-xaajoodyo iyo xiriirro diblomaasiyadeed ay socdaan, si xal loogu helo xaaladda la haystayaasha. Afhayeenka wasaaradda, Tahir Andrabi, ayaa sheegay in dowladda Pakistan ay si dhow ula socoto arrinta, isla markaana ay la shaqeynayso dhammaan dhinacyada ay quseyso.
Sida ay sheegayaan ilo diblomaasiyadeed, Dowladda Soomaaliya ayaa ballan qaadday wada-shaqeyn buuxda oo lagu badbaadinayo shaqaalaha markabka shidaalka ee Honour 25. Dowladda Federaalka ayaa sidoo kale la sheegay inay bixisay dammaanad qaad ku saabsan taageerada hawlgallada samata bixinta.
Qoysaska dadka la haysto ayaa codsi degdeg ah u diray Ra’iisul Wasaaraha Pakistan, Shehbaz Sharif, iyo Taliyaha Ciidamada Badda, iyagoo ka dalbaday in dadaallada lagu sii deynayo ehelladooda la dardargeliyo.
Afduubkan cusub ayaa dib u soo celiyay walaacii laga qabay dib u soo laabashada burcad-badeedda xeebaha Soomaaliya, kuwaas oo sanadihii hore caan ku ahaa weerarro culus oo ka dhici jiray Badweynta Hindiya.
Pakistan ayaa sidoo kale sheegtay in xaaladda gobolka iyo xannibaadaha marinnada muhiimka ah ee ganacsiga badda, gaar ahaan marinka Hormuz, ay sii adkeeyeen xaaladda amniga iyo isu-socodka maraakiibta.
Mas’uuliyiinta Pakistan ayaa muujiyay rajo ah in wada-hadallada socda ay horseedi doonaan sii deynta badmaaxayaasha iyo dib u soo celinta xasilloonida marinada badda ee gobolka.
