Wararka24: Dowladda Pakistan ayaa ku dhawaaqday inay furtay lix waddo oo cusub oo dhanka dhulka ah, kuwaas oo loogu talagalay in badeecadaha lagu gaarsiiyo dalka Iran, xilli ay sii xoogeysanayaan culeysyada ka dhashay xayiraadaha ganacsi ee gobolka.
Go’aankan cusub ayaa yimid iyadoo kumannaan konteenarro ay ku xanniban yihiin dekedda Karachi, kadib caqabado la xiriira isu socodka maraakiibta iyo xaaladda cakiran ee ka taagan marin-biyoodka Hormuz iyo go’doominta ay Mareykanku saareen dekedaha Iran. Wasaaradda Ganacsiga Pakistan ayaa sheegtay in nidaamkan cusub uu dhaqan galay 25-kii Abriil.
Nidaamkan wuxuu sahlayaa in badeecadaha ka yimaada dalal saddexaad lagu sii gudbiyo dhulka Pakistan, si ay ugu gudbaan gudaha Iran. Tallaabadan ayaa kusoo aadeysa xilli wasiirka arrimaha dibadda Iran, Cabbaas Araghchi, uu booqasho ku tegay Islamabad, halkaas oo uu kula kulmay madaxda sare ee Pakistan.
Wasiirka Ganacsiga Pakistan, Jam Kamal Khan, ayaa sheegay in qorshahan uu yahay tallaabo muhiim ah oo lagu xoojinayo ganacsiga gobolka, islamarkaana Pakistan loogu beddelayo marin muhiim ah oo isku xira dalalka dariska ah.
Waddooyinka cusub ayaa isku xiraya dekedaha Karachi, Port Qasim iyo Gwadar, iyagoo gaaraya xuduudda Iran ee Gabd iyo Taftan. Mas’uuliyiinta Pakistan ayaa sheegay in marinka Gwadar ilaa Gabd uu si weyn u yareynayo waqtiga safarka iyo kharashaadka gaadiidka.
Go’doominta Mareykanku aya sababay ganacsiga badda iyo kororka qiimaha caymiska maraakiibta ayaa sare u qaaday muhiimadda marinnada berriga. Falanqeeyayaal ayaa sheegaya in tallaabadan ay beddeli karto jihada ganacsiga gobolka, isla markaana saameyn ku yeelan karto waddamada deriska la ah Pakistan, gaar ahaan Afghanistan.
