Wararka24: Weerar culus oo la sheegay in ay fuliyeen ciidamada Pakistan ayaa laga soo sheegay gobolka Kunar ee dalka Afghanistan, halkaas oo lagu dilay ugu yaraan 7 qof, laguna dhaawacay in ka badan 75 kale, sida ay sheegeen ilo kala duwan oo ay BBC soo xigatay.
Dadka waxyeelladu gaartay ayaa la sheegay inay ku jiraan arday iyo macallimiin ka tirsan Jaamacadda Kunar, iyadoo dowladda Taliban ay sheegtay in 30 ka mid ah dhaawacyada ay yihiin arday jaamacadeed.
Wasaaradda warfaafinta ee Pakistan ayaa beenisay in ay beegsatay jaamacadda iyo deegaanno rayid ah, iyadoo ku tilmaantay wararkaasi kuwo aan sax ahayn.
Dhanka kale, mas’uuliyiinta Taliban ayaa sheegay in weerarka lagu adeegsaday madaafiic iyo gantaallo, halka ilo kale ay tilmaameen in diyaarado dagaal iyo drones loo adeegsaday duqeynta. Weerarkan ayaa dhacay xilli gobolka uu hore u wajahayay xiisado amni iyo duqeymo isdaba joog ah.
Warbixinnada ayaa sidoo kale muujinaya in toddobaadyadii la soo dhaafay ay jireen dadaallo dhexdhexaadin ah oo ay hormuud ka ahayd China, kuwaas oo horseeday xabbad-joojin jilicsan oo u dhexeysa Pakistan iyo Taliban, inkastoo ay hadda mar kale xiisaddu cirka isku shareertay.
Afhayeenka Taliban ayaa weerarradan ku tilmaamay “dambiyo dagaal,” halka Pakistan ay sheegtay in howlgalladeedu ay bartilmaameedsadaan kooxo hubeysan oo ku sugan gudaha Afghanistan.
Xiisaddan cusub ayaa muujinaysa sii xumeynta xiriirka u dhexeeya labada dal, xilli ay hore u jireen eedeymo is-daba joog ah iyo dagaallo xuduudeed oo sababay khasaare culus.
