Wararka24: Dowladda Federaalka Soomaaliya ayaa sheegtay in ugu yaraan 25 xubnood oo ka tirsan Al-Shabaab lagu dilay howlgal isugu jiray duqeyn iyo weerar toos ah oo laga fuliyay deegaanka Suullay, oo qiyaastii 17 kiiloomitir koonfur ka xiga deegaanka Teedaan ee gobolka Hiiraan.
War-saxaafadeed ay soo saartay Wasaaradda Gaashaandhigga ayaa lagu sheegay in dadka la dilay ay isugu jiraan 18 dagaalyahan, afar xubnood oo ka tirsanaa firxadka kooxda iyo saddex horjooge oo magacyadooda lagu kala sheegay Aadan Maxamed Jimcaale, Ibraahim Aadan Daahir iyo Aadan Abshir Cabdi.
Wasaaraddu waxay sidoo kale sheegtay in Yuuroow Caawid Cali uu ahaa horjoogihii kooxda ee deegaanka, isla markaana howlgalka lagu beegsaday xarumo iyo xubno muhiim u ahaa Al-Shabaab.
Sida lagu sheegay war-saxaafadeedka, xubno kale oo ka tirsanaa Al-Shabaab ayaa isku soo dhiibay Ciidanka Xoogga Dalka Soomaaliya, halka kuwo kalena ay goobta ka baxsadeen intii uu socday howlgalka.
Wasaaradda Gaashaandhigga ayaa sheegtay in howlgalka uu qeyb ka yahay dadaallada socda ee lagu wiiqayo awoodda Al-Shabaab, iyadoo kaashaneysa saaxiibbada caalamiga ah ee taageera howlaha amniga Soomaaliya. Dowladda ayaa intaas ku dartay in howlgallada ka dhanka ah kooxda ay sii socon doonaan.
Ilaa iyo hadda, Al-Shabaab kama aysan hadlin sheegashada dowladda ee ku saabsan khasaaraha iyo faahfaahinta howlgalka, mana jirto ilo madax-bannaan oo si rasmi ah u xaqiijiyay tirada khasaaraha la sheegay.
