Wararka24: Taliye ku-xigeenka Ciidanka Booliska Soomaaliyeed, Jeneraal Cabdalla Cabdalla Maxamed, ayaa si kulul uga jawaabay eedeymo uu u jeediyay Guddoomiye ku-xigeenka labaad ee Golaha Shacabka, Cabdullaahi Cumar Abshirow, oo la xiriiray xaaladda gobolka Shabeellaha Hoose.
Abshirow ayaa ku eedeeyay Jeneraal Cabdalla inuu ku lug leeyahay abaabulka kooxo hubeysan iyo qorshe lagu dhisayo maamul ka madax-bannaan maamulka Koonfur Galbeed. Waxa uu sidoo kale sheegay in dowladda Imaaraadka Carabta ay taageero u fidinayso dhaqdhaqaaqyo ka socda magaalada Marka iyo deegaanno kale oo gobolka ka tirsan.
Qoraal uu soo saaray, Jeneraal Cabdalla Cabdalla ayaa si cad u beeniyay eedeymahaas, isagoo ku tilmaamay kuwo aan sal iyo raad lahayn. Wuxuu sheegay inay tahay arrin laga xumaado in shacabka Shabeellaha Hoose lagu tilmaamo maleeshiyaad, isagoo xusay inay door muhiim ah ka qaataan difaaca dalka iyo garab istaagga Ciidamada Dowladda Federaalka Soomaaliya.
Jeneraalka ayaa sheegay in hadallada loo jeediyay ay yihiin eedeymo aan xaqiiqo ku dhisnayn, isla markaana ay u muuqdaan kuwo leh ujeeddooyin siyaasadeed. Wuxuu adkeeyay inuusan wax lug ah ku lahayn abaabul kasta oo lagu eedeeyay.
Dhankiisa, Jeneraal Cabdalla ayaa sidoo kale eedeyn u jeediyay Guddoomiye ku-xigeenka Golaha Shacabka, isagoo ku andacooday inuu hore ula soo shaqeeyay kooxda Al-Shabaab, isla markaana uu weli isku dayayo inuu abuuro kala qaybsanaan iyo iska horimaad bulshada dhexdeeda. Wuxuu sheegay in maanta shacabka iyo dowladda ay si wadajir ah uga shaqeynayaan sugidda amniga iyo la dagaallanka kooxaha hubeysan.
Hadalladan is dhaafsiga ah ayaa kusoo aadaya xilli ay taagan yihiin dooddo siyaasadeed iyo eedeymo la xiriira amniga iyo maamulka deegaannada ka tirsan gobolka Shabeellaha Hoose, iyadoo aan jirin caddeyn madax-bannaan oo xaqiijinaysa eedeymaha ay labada dhinac isu jeediyeen.
