Wararka24: Wasaaradda Gaashaandhigga Soomaaliya ayaa sheegtay in Ciidamada Xoogga Dalka ay howlgal qorsheysan ka fuliyeen deegaanka Hantiwadaag ee gobolka Shabeellaha Hoose, kaas oo lagu dilay Cabdisalaan Macallin Abuukar, oo dowladda ku sheegtay horjooge ka tirsanaa Al-Shabaab. Cabdisalaan Macallin Abuukar aya muddo dheer ku daba jirtay Dowladda Federaalka, isla markaana halis ku ahaa shacabka Soomaaliyeed.
Sida lagu sheegay warsaxaafadeedka wasaaradda, Cabdisalaan Macallin Abuukar ayaa la sheegay inuu Al-Shabaab u qaabilsanaa qorista maleeshiyaad cusub iyo uruurinta lacagaha baadda ah ee dowladda ay sheegtay in kooxda ka qaaddo shacabka. Dowladda ayaa intaas ku dartay in howlgalka la fuliyay 10-kii Luulyo 2026, kaddib markii muddo lala socday dhaq-dhaqaaqiisa.
Wasaaraddu waxay sidoo kale sheegtay in howlgalka lagu dhaawacay Macallin Daa’uud, oo ay ku tilmaantay horjooge kale oo Al-Shabaab u qaabilsanaa arrimaha amniga gudaha iyo dabagalka.
Dowladdu waxay intaas ku dartay in labada nin lagu bartilmaameedsaday xilli ay ku howlnaayeen qorsheyaal ay ku sheegtay kuwo lagu waxyeelleynayo shacabka Soomaaliyeed. Sidoo kale, waxay sheegtay in Al-Shabaab ay gudaha Hantiwadaag ku aastay Cabdisalaan Macallin Abuukar, inkastoo aan sheegashadaas si madax-bannaan loo xaqiijin.
Wasaaradda Gaashaandhigga ayaa caddeysay inay sii wadi doonto howlgalada lagu bartilmaameedsanayo horjoogayaasha Al-Shabaab ee ku sugan deegaannada kala duwan ee dalka. Dhanka Al-Shabaab weli kama soo bixin war rasmi ah oo ay kaga hadashay sheegashada dowladda ee ku saabsan howlgalka iyo khasaaraha la sheegay.
