Wararka24: Xubnaha siyaasiyiinta mucaaradka ee dhaq-dhaqaaqyada ka wada magaalada Muqdisho ayaa si kulul uga falceliyay khudbaddii uu Madaxweyne Hassan Sheikh Mohamud habeenkii Talaadada u jeediyay odayaasha dhaqanka Soomaaliyeed, xilli uu casho sharaf ugu sameeyay xarunta Villa Somalia.
Abdirahman Abdishakur Warsame, oo ka tirsan Baarlamaanka Federaalka Soomaaliya kana mid ah siyaasiyiinta mucaaradka, ayaa ku tilmaamay khudbadda madaxweynaha mid aan lahayn nuxur siyaasadeed oo mideyn kara bulshada. Wuxuu sheegay inay ahayd khudbad ka muuqatay isku dhex yaac iyo kalsooni darro siyaasadeed.
Cabdiraxmaan Cabdishakuur ayaa xusay in hadalka madaxweynaha looga baahnaa inuu dejiyo dareenka shacabka, xoojiyo midnimada ummadda, isla markaana ka fogaado hadallo kala qaybin abuuri kara. Sida uu sheegay, khudbaddii la jeediyay ma aysan ka tarjumeyn mas’uuliyadda madaxtinimo iyo xaaladda xasaasiga ah ee dalka marayo.
Sidoo kale, siyaasiga mucaaradka ayaa ku dhaliilay madaxweynaha inuu odayaasha dhaqanka la wadaagay walaaca la xiriira dhammaadka muddo-xileedkiisa, halkii uu ka soo bandhigi lahaa qorshe cad oo lagu wajaho xaaladda siyaasadeed.
Dhankiisa, Madaxweyne Xasan Sheekh ayaa difaacay mowqifkiisa, isagoo sheegay inuu ka duwan yahay habkii siyaasadeed ee dowladdii hore, isla markaana uu la tashiyo ballaaran la sameeyay dhinacyada kala duwan ee siyaasadda.
Madaxweynaha ayaa ku adkeystay in Soomaaliya ay u gudbi doonto doorasho qof iyo cod ah, isaga oo sheegay in shacabka la siinayo fursad ay si toos ah uga qayb qaataan doorashada hoggaanka dalka.
Xiisadda siyaasadeed ee ka taagan Soomaaliya ayaa sii xoogeysanaysa, iyadoo weli la isku hayo hannaanka doorashooyinka iyo sida loo wajahayo marxaladda kala guurka ah ee dalka.
