Wararka24: Madaxweynaha Jamhuuriyadda Federaalka Soomaaliya Xasan Sheekh Maxamuud ayaa casho-sharaf ka dhacday xarunta Madaxtooyada Qaranka ku maamuusay hoggaanka dhaqanka Soomaaliyeed, kuwaasi oo isaga yimid guud ahaan deegaannada Soomaalida.
Madaxweynaha ayaa kulankaas ku bogaadiyay odayaasha dhaqanka doorkooda ku aaddan nabadeynta, dib-u-heshiisiinta, dowlad-dhiska iyo ilaalinta midnimada ummadda Soomaaliyeed. Waxa uu sidoo kale la wadaagay guulaha ay dowladdu ka sheegtay dhinacyada amniga, dimuqraadiyeynta, dhismaha hay’adaha dowladda iyo daadejinta maamulka.
Xasan Sheekh Maxamuud ayaa si gaar ah carrabka ugu adkeeyay muhiimadda ay leedahay in shacabka Soomaaliyeed dib loogu celiyo awoodda doorashada hoggaankooda siyaasadeed, isaga oo sheegay in dowladda ay ka go’an tahay hirgelinta doorasho qof iyo cod ah.
Madaxweynaha ayaa ugu baaqay hoggaanka dhaqanka Soomaaliyeed inay taageeraan dadaallada lagu xaqiijinayo doorasho loo dhan yahay, taas oo uu ku tilmaamay tallaabo muhiim u ah xaqiijinta matalaad dhab ah iyo nidaam dimuqraadi ah oo hufan.
Waxa uu sheegay in muddo dheer shacabka Soomaaliyeed aysan si toos ah u helin fursad ay ku doortaan hoggaankooda, isla markaana loo baahan yahay in la xaqiijiyo xuquuqdooda dastuuriga ah ee doorashada.
Dhankooda, qaar kamid ah hoggaanka dhaqanka Soomaaliyeed ayaa uga mahadceliyay Madaxweynaha casuumaadda iyo maamuuska uu u sameeyay, iyaga oo bogaadiyay dadaallada dowladda ee dhinacyada amniga, la dagaallanka Al-Shabaab, horumarinta dhaqaalaha iyo geeddi-socodka dimuqraadiyeynta dalka.
