Wararka24: Siyaasiga mucaaradka dalka Jabuuti, Alexis Mohamed Gueldon, ayaa eedeymo u jeediyay Madaxweynaha Soomaaliya, Xasan Sheekh Maxamuud, isagoo ku andacooday in siyaasadaha dowladda federaalka ay wiiqeen kalsoonidii lagu qabay nidaamka federaalka Soomaaliya.
Qoraal uu ku baahiyay baraha bulshada ayuu Gueldon ku sheegay in wax-ka-beddellada dastuurka, murannada siyaasadeed iyo khilaafaadka u dhexeeya dowladda federaalka iyo qaar kamid ah dowlad-goboleedyada ay saameyn ku yeesheen sumcadda iyo kalsoonida hay’adaha dowladda.
Siyaasigan ayaa ku dooday in xaaladahaasi ay sii adkeeyeen caqabadaha horyaalla dadaallada lagu xoojinayo wadajirka iyo midnimada dalka, isla markaana ay abuureen shaki ku saabsan xasilloonida siyaasadeed ee Soomaaliya.
Gueldon ayaa si gaar ah u xusay khilaafka u dhexeeya dowladda federaalka iyo Puntland, isagoo ku tilmaamay tusaale muujinaya kala aragti duwanaanshaha ka jira qaabka maamulka iyo awood qaybsiga dalka.
Sidoo kale, wuxuu sheegay in murannada siyaasadeed ee daba dheeraaday ay saameyn ku yeesheen kalsoonida shacabka iyo tan beesha caalamka ee ku aaddan hay’adaha dowladda federaalka.
Dhanka kale, Gueldon ayaa tilmaamay in inkastoo dalal badan ay weli taageersan yihiin midnimada iyo madaxbannaanida Soomaaliya, haddana ay jiraan xiriirro sii kordhaya oo dhinacyo caalami ah la sameynayaan Somaliland, gaar ahaan dhinacyada amniga, dhaqaalaha iyo diblomaasiyadda.
Ugu dambeyn, siyaasigan mucaaradka ah ayaa ku baaqay in dib loo xoojiyo wada-shaqeynta siyaasadeed iyo kalsoonida u dhexeysa heerarka kala duwan ee dowladda, si loo adkeeyo nidaamka federaalka iyo midnimada dalka.
