Wararka24: Taliyaha Hay’adda Sirdoonka iyo Nabad Sugidda Qaranka (NISA), Mahad Maxamed Salaad, ayaa maanta magaalada Balanballe ee gobolka Galgaduud ka dhagax-dhigay xero ciidan oo ay yeelan doonaan ciidamada hay’adda.
Xeradan cusub ayaa loogu talagalay inay saldhig u noqoto ciidamada NISA ee ka shaqeyn doona sugidda amniga degmada Balanballe iyo deegaannada ku xeeran, iyadoo la filayo inay gacan ka geysato xoojinta amniga gobolka.
Munaasabadda dhagax-dhigga waxaa ka qayb galay mas’uuliyiin ka tirsan maamulka Galmudug, saraakiil ciidan iyo qaybaha kala duwan ee bulshada, kuwaas oo soo dhaweeyay dadaallada lagu horumarinayo hay’adaha amniga.
Mahad Salaad, oo safar shaqo ku maraya deegaanno ka tirsan Galmudug, ayaa intii uu ku sugnaa gobolka Galgaduud kormeeray xaaladda amniga, gaar ahaan degmooyinka ay ka socdaan howlgalada ka dhanka ah Al-Shabaab.
Taliyaha NISA ayaa sidoo kale kulamo la yeeshay saraakiisha amniga, maamulka degmada iyo qaybaha bulshada, kuwaas oo looga hadlay xoojinta wada-shaqeynta hay’adaha amniga iyo bulshada, ilaalinta nabadda iyo taageeridda dadaallada sugidda amniga.
Maalmo ka hor, Mahad Salaad ayaa magaalada Caabudwaaq ka dhagax-dhigay xero kale oo ay yeelan doonto NISA, taas oo qayb ka ah qorshaha lagu ballaarinayo xarumaha amniga ee gobolka Galgaduud.
Taliyaha ayaa sheegay in xarumaha cusub ay muhiim u yihiin sugidda amniga deegaannada gobolka, isla markaana ay door ka qaadan doonaan la dagaallanka kooxaha khatarta ku ah xasilloonida dalka.
Dowladda Federaalka Soomaaliya ayaa muddooyinkii dambe xoojisay dadaallada lagu ballaarinayo xarumaha ciidamada iyo hay’adaha amniga ee gobollada dalka, si loo taageero howlgalada ka dhanka ah kooxaha hubeysan.
