Madaxweynaha Dowladda Federaalka Soomaaliya, Xasan Sheekh Maxamuud, ayaa maanta xarunta madaxtooyada ku qaabilay halyeeyada kubadda cagta Afrika ee kala ah Samuel Eto’o, Emmanuel Adebayor iyo Jay-Jay Okocha.
Booqashada saddexdan ciyaaryahan oo caalami ah ayaa qeyb ka ahayd dadaallo lagu dhiirrigelinayo nabadda, midnimada, iyo horumarinta dhalinyarada Soomaaliyeed. Intii ay joogeen magaalada Muqdisho, halyeeyadan waxay ka qeyb galeen kulan kubadeed taariikhi ah oo lagu qabtay garoonka Muqdisho Stadium.
Madaxweynaha Xasan Sheekh ayaa uga mahadceliyay booqashadooda, isagoo ku tilmaamay mid muujinaysa isbeddelka iyo xasilloonida dalka. Waxa uu xusay in ay muhiim u tahay in dunida inteeda kale ay aragto horumarka ay Soomaaliya ku tallaabsaneyso.
Munaasabaddan waxaa sidoo kale goobjoog ka ahaa masuuliyiin sare oo ka tirsan dowladda, madaxda xiriirka kubadda cagta Soomaaliyeed, iyo marti sharaf kale oo ka kala socotay qaar kamid ah dalalka deriska ah.
Ciyaartan lagu qabtay garoonka Muqdisho Stadium ayaa si weyn u soo jiidatay bulshada, iyadoo lagu soo bandhigay fariin nabadeed iyo mid dhiirrigelinaysa isdhexgalka dhalinyarada.
Safarka halyeeyada kubadda cagta ee Afrika ayaa loo arkaa mid kor u qaadaya niyadda dhalinyarada Soomaaliyeed, isla markaana xoojinaya xiriirka isboorti ee Soomaaliya iyo dunida inteeda kale.
