Garoowe – Talaado, 28-ka Oktoobar 2025 – Madaxweynaha Dowladda Puntland, Siciid Cabdullaahi Deni, ayaa maanta soo saaray xeer Madaxweyne Lr. 09 oo ku taariikhaysan 28-da Oktoobar 2025, kaas oo lagu kala diray Maxkamaddii Ciidamada Qalabka Sida iyo Dambiyada Culus ee Puntland.
Wareegtada oo kasoo baxday Madaxtooyada Puntland ayaa lagu sheegay in go’aankan uu yimid kadib cabashooyin taxane ah oo ku saabsan eedeymo la xiriira caddaalad-darro iyo musuqmaasuq ay soo gudbiyeen garsoorayaal iyo dad horey ugu xukun dhacay maxkamadda.
Madaxweyne Deni ayaa sheegay in talaabadan ay qayb ka tahay qorshe dib-u-habeyn ballaaran oo lagu hagaajinayo nidaamka garsoorka, xafiiska xeer-ilaalinta iyo maamulka cadaaladda guud ahaan Puntland, si loo xaqiijiyo hufnaan iyo isla xisaabtan dhab ah.
Inta lagu guda jiro dhismaha maxkamad cusub, go’aannada la xiriira dacwadaha dambiyada culus ayaa si ku-meel gaar ah u gaari doona Maxkamadaha Racfaanka Puntland, sida lagu caddeeyay xeerka uu madaxweynuhu saxiixay.
Sidoo kale, saraakiishii hore ee ka tirsanaa garsoorka maxkamadda ciidamada ayaa lagu amray inay dib ugu laabtaan talisyadoodii hore, halka Madaxweynaha uu ballanqaaday in dhawaan la soo magacaabi doono garsoor cusub oo hufan.
Sanadkii hore, Madaxweyne Deni ayaa shaqo joojin ku sameeyay qaar ka mid ah masuuliyiinta maxkamadda, kadib markii lagu eedeeyay khaladaad sharciyeed iyo eex lagu arkay go’aamo ay soo saareen.
Go’aankan cusub ayaa imaanaya xilli Puntland ay ku jirto marxalad dib-u-habeyn amni iyo siyaasadeed, iyadoo Madaxweynaha uu qorsheynayo isku shaandheyn lagu sameynayo golaha wasiirrada, agaasimayaasha guud iyo guddoomiyayaasha gobollada.
