Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, ayaa maanta magaalada Muqdisho kulan gaar ah kula yeeshay wafdi ka sare oo ka socday Imaaraadka Carabta, kaas oo uu horkacayay Wasiiru-Dowlaha Arrimaha Dibadda Imaaraadka, Sheikh Shakhboot Binu Nahyaan Aala-Nahyaan.
Kulankan oo ahaa mid xasaasi ah ayaa daba-socday wada-hadal dhanka taleefanka ku dhex maray labada madaxweyne, kaas oo ay ku adkeeyeen iskaashiga walaalnimo iyo wadashaqeyneed ee labada dowladooda.
Wasiiru-dowlaha maanta la kulmay Madaxweyne Xasan ayaa soo gaarsiiyey dhambaal iyo farriin uu ka siday Madaxweynaha Isutagga Imaaraatka Carabta, Mudane Maxamed Binu Saayid, oo xoojinaya xiriirka labo geesoodka ah iyo iskaashiga istiraatiijiga ah ee u dhexeeya labada dal ee walaalaha ah.
Madaxweynaha Somaaliya ayaa guddoomay farrinta, isagoo uga mahadceliyay Dowladda iyo shacabka Imaaraatka Carabta taageerada joogtada ah ee Soomaaliya iyo doorka ay ka qaadanayaan horumarinta iyo garab istaagga shacabka Soomaaliyeed.
Dhankiisa, Wasiiru-dowlaha Arrimaha Dibadda Imaaraatka, Sheikh Shakhboot Binu Nahyaan Aala-Nahyaan, ayaa uga mahadceliyey Dowladda Federaalka Soomaaliya soodhaweynta diirran iyo sida ay uga go’an tahay xoojinta xiriirka taariikhiga ah ee labada dal. Wuxuu tilmaamay muhiimadda iskaashiga Soomaaliya iyo Imaaraatka ay u leedahay horumarka iyo xasilloonida Gobolka.
Taageerada Imaaraadka iyo dhaqaalaha Soomaaliya
Dowladda Soomaliya ayaa dhaqaale ahaan si weyn ugu tiirsan Imaaraadka, si gaar ah waxay Soomaaliya ka taageeraan dagaalka Al-Shabaab, mushaarka ciidamada qaar, kabka miisaaniyadda, iyo lacago kale oo mararka qaar ay dowladdu u baahato.
Dhowaan, Madaxweyne Xasan Sheekh ayaa safar aan xogtiisa la shaacin ku tegay dalka Imaaraadka, isagoo la soo kulmay madaxda dalkaas.
Safarkaan uu dhalax-sugaha Imaaraadku ku yimid Muqdisho wuxuu ku soo aadayaa iyadoo xilkii laga qaaday Wasiirkii Gaashaandhigga, Cabdulqaadir Jaamac, oo Madaxweyne Xasan Sheekh u hayey galka Imaaraadka.
Waxaa xusid mudan in dhowr mar Imaaraadku uu dowladda federaalka Soomaaliya ku cadaadiyey hufnaan u maamulidda dhaqaalaha ay siiyaan, iyadoo mar ay dalbadeen baaritaan. Balse saraakiishii loo xilsaaray baaritaankaas ayaa lagu dilay toogasho ka dhacday xerada Jeneraal Goordan ee magaalada Muqdisho.
Wixii ka dambeeyey markii saraakiishaas la dilay, waxaa is bedeshay firfircoonidii Imaaraadku la garab taagnaa Soomaaliya. Waxayna Xasan Sheekh u muujiyeen in dhabarka ay xijiyeen, iyagoo ka wareegay dhanka Soomaliland iyo maamul goboleedyada kale qaar, ilaa ay Cabdiraxmaan Cirro ku casuumeen maqaamkii uu lahaa Xasan Sheekh.
📌 Wararka24 – Xog rasmi ah oo faahfaahin degdeg ah
