Wararka24: Madaxweynaha Xiriirka Kubadda Cagta Adduunka ee FIFA, Gianni Infantino, ayaa ka hadlay xaaladda garsooraha Soomaaliyeed Cumar Cabdulqaadir Cartan, isagoo sheegay in dhacdada ku dhacday garsoorahaasi ay tahay mid laga xumaado, balse FIFA aysan awood u lahayn inay wax ka beddesho go’aannada ay gaaraan dowladaha iyo hay’adaha amniga.
Infantino oo warbaahinta kula hadlay shir jaraa’id ayaa sheegay in FIFA ay mar walba ku dadaasho sidii xal loogu heli lahaa caqabadaha noocan oo kale ah, isla markaana ay la xiriirto dhinacyada ay khuseyso marka ay soo baxaan arrimo saameynaya bahda kubadda cagta.
“Waa arrin nasiib darro ah waxa ku dhacay Cumar Cartan. Waxaan mar walba isku daynaa inaan xal u helno xaaladaha noocan ah, waxaanan la xiriiri doonnaa dhinacyada ay khuseyso si loo eego waxa suuragalka ah,” ayuu yiri Madaxweynaha FIFA.
Wuxuu sidoo kale tilmaamay in mararka qaar xalinta arrimaha noocan ah ay u baahan tahay wada-hadal iyo dadaal diblomaasiyadeed, halkii laga adeegsan lahaa cadaadis degdeg ah ama hadallo kulul.
Infantino ayaa carrabka ku adkeeyay in FIFA ay tahay hay’ad isboorti oo aan lahayn awood ay ku maamusho dowladaha ama hay’adaha amniga. Wuxuu sheegay in ururku uu qabto wixii suuragal ah awooddiisa, balse uusan go’aan ka gaari karin arrimaha socdaalka iyo amniga dalalka martigelinaya tartamada.
Hadalkan ayaa imanaya kadib markii Garsoore Cumar Cartan looga diiday inuu galo Mareykanka, inkastoo loo qorsheeyay inuu ka qeyb qaato howlaha la xiriira Koobka Adduunka. Dhacdadaas ayaa dhalisay falcelin ballaaran gudaha Soomaaliya iyo fagaarayaasha caalamiga ah.
Cumar Cartan ayaa shalay dib ugu soo laabtay magaalada Muqdisho, halkaas oo si weyn loogu soo dhaweeyay, waxaana uu sheegay inuu sii wadi doono dadaalkiisa garsoornimo islamarkaana uu rajeynayo inuu ka qeyb galo tartamada waaweyn ee mustaqbalka.
