Wararka24: Ra’iisul Wasaaraha Soomaaliya, Xamza Cabdi Barre, ayaa maanta xafiiskiisa ku qaabilay garsooraha caalamiga ah ee Soomaaliyeed Cumar Cabdiqaadir Cartan. Kulanka ayaa yimid xilli garsooraha si weyn loogu soo dhaweeyay Muqdisho kadib markii uu dib ugu soo laabtay dalka.
Ra’iisul Wasaaraha ayaa ku ammaanay Cartan dadaalka iyo guulaha uu ka gaaray garsoorka kubadda cagta heerka caalami. Wuxuu sheegay in dowladda iyo shacabka Soomaaliyeed ay garab taagan yihiin garsooraha, isla markaana ay ku faanayaan horumarka uu ka sameeyay fagaarayaasha caalamiga ah.
Xamza Cabdi Barre ayaa xusay in Cumar Cartan uu yahay tusaale muujinaya kartida iyo adkeysiga dhalinyarada Soomaaliyeed. Wuxuu ku booriyay inuu sii wado dadaalkiisa xirfadeed, islamarkaana uusan niyad jabin inkastoo uu la kulmay caqabado ku saabsan safarkiisii ugu dambeeyay.
Ra’iisul Wasaaraha ayaa sheegay in guulaha Cartan ay sare u qaadeen magaca Soomaaliya, gaar ahaan dhinaca isboortiga. Wuxuu tilmaamay in horumarkiisu uu dhiirrigelin u yahay ciyaartoyda, garsoorayaasha iyo dhalinyarada Soomaaliyeed ee hamiga u leh inay gaaraan heerar caalami ah.
Cumar Cartan ayaa sanadkii 2025 loo aqoonsaday garsooraha ragga ee ugu wanaagsan Afrika, taas oo ahayd guul weyn oo uu ku kasbaday sumcad heer qaaradeed ah. Sidoo kale waxaa loo xushay inuu ka mid noqdo garsoorayaasha loo qorsheeyay hawlaha la xiriira Koobka Adduunka 2026.
Si kastaba, qorshihiisii ka qaybgalka howlaha tartanka ayaa hakad galay kadib markii loo diiday inuu galo Mareykanka. Arrintan ayaa dhalisay falcelin xooggan gudaha Soomaaliya iyo meelo kale oo caalamka ah, iyadoo dad badan ay muujiyeen taageeradooda.
Kulanka uu la yeeshay Ra’iisul Wasaaraha ayaa kusoo aadaya xilli bulshada Soomaaliyeed ay si weyn u xusayaan kaalinta uu Cartan ka gaaray horumarinta garsoorka kubadda cagta. Dowladda ayaa sheegtay inay sii wadi doonto dhiirrigelinta iyo taageerada xirfadlayaasha Soomaaliyeed ee guulaha ka gaaraya heerarka caalamiga ah.
