Wararka24: Ra’iisul Wasaaraha Soomaaliya Xamza Cabdi Barre ayaa khadka taleefanka kula xiriiray Madaxweynaha Jabuuti Ismaaciil Cumar Geelle, iyagoo ka wada hadlay arrimo ku saabsan guushii doorashada iyo xiriirka labada dal. Wadahadalkan ayaa qeyb ka ah xiriirka diblomaasiyadeed ee u dhexeeya labada dowladood.
Ra’iisul Wasaaraha ayaa ugu horreyn hambalyo u diray Madaxweyne Geelle, kaddib markii uu mar kale ku guuleystay doorashadii madaxtooyada ee dalkaasi. Wuxuu bogaadiyay kalsoonida ay shacabka Jabuuti mar kale siiyeen hoggaankooda.
Xamza Cabdi Barre ayaa sidoo kale u rajeeyay Madaxweynaha Jabuuti inuu si wanaagsan u guto waajibaadka muddada cusub, isaga oo ku ammaanay shacabka Jabuuti sida nabadda iyo deggenaanshaha leh ee ay doorashada u maareeyeen.
Inta uu socday wada hadalka, Ra’iisul Wasaaraha ayaa uga mahadceliyay dowladda Jabuuti doorka ay ka qaadato xoojinta amniga gobolka iyo taageerada ay siiso Soomaaliya. Wuxuu xusay in iskaashiga labada dal uu yahay mid muhiim u ah xasilloonida Geeska Afrika.
Madaxweyne Geelle ayaa dhawaan mar kale loo doortay xilka, isagoo helay boqolkiiba sare oo codad ah, sida lagu shaaciyay natiijooyinka rasmiga ah. Doorashadan ayaa timid xilli ay mucaaradku qaadaceen ka qeybgalkeeda.
Jabuuti ayaa door muhiim ah ku leh arrimaha amniga iyo siyaasadda gobolka, iyadoo ay sii xoojineyso doorkeeda diblomaasiyadeed. Wadahadalkan ayaa muujinaya xiriirka dhow ee u dhexeeya Soomaaliya iyo Jabuuti.
