Pyongyang, Sept 27, 2025 (Wararka24) -Hoggaamiyaha Kuuriyada Waqooyi, Kim Jong Un, ayaa amar ku siiyay mas’uuliyiinta sare ee barnaamijka nukliyeerka dalkiisa in ay xoojiyaan “gaashaanka iyo seefta nukliyeerka,”
isagoo sheegay in hubka nukliyeerka uu yahay jawaabta kaliya ee ku habboon “cadawga shisheeye.”
Kim ayaa hadalkan ka sheegay kulan uu Jimcihii la yeeshay saynisyahannada iyo farsamayaqaannada nukliyeerka, oo uu ku jiray Hong Sung-mu, sarkaal sare oo door muhiim ah ku lahaa horumarinta barnaamijka nukliyeerka dalka Waqooyiga Kuuriya.
Warbaahinta rasmiga ah ee dalkaas, KCNA, ayaa sheegtay in Kim uu ku adkeystay in soo saarista qalabka iyo hubka nukliyeerka loo arko mudnaanta ugu weyn ee qaranka,
iyadoo barnaamijkan uu noqday tiirka ugu muhiimsan ee difaaca Pyongyang.
