Wararka24: 27-02-2026 Xildhibaan Ilhaan Cumar oo ka tirsan Golaha Congress-ka Mareykanka ayaa sheegtay inay si buuxda daacad ugu tahay Mareykanka, isla markaana ay sii wadi doonto u adeegidda dadka ay matasho.
Waxay sidoo kale caddeysay inay taageersan tahay Soomaaliya mideysan, arrintaas oo ay ku tilmaantay mid waafaqsan siyaasadda rasmiga ah ee Mareykanka ee ku aaddan midnimada dhuleed ee Soomaaliya.
Ilhaan Cumar, oo laga soo doorto gobolka Minnesota, ayaa hadalkan ka jeedisay kaddib muran ka dhashay khudbad ay jeedisay 27-kii Janaayo. Qaar ka mid ah dadka dhaleeceeya ayaa ku eedeeyay inay ku xadgudubtay dhaartii ay qaadday, iyagoo ku dooday inay muujisay daacadnimo ka baxsan Mareykanka.
Xildhibaan Tom Emmer, oo isaguna ka soo jeeda Minnesota, ayaa ku baaqay in baaritaan anshaxeed lagu sameeyo, isagoo sheegay in hadallada loo nisbeeyay ay u baahan yihiin caddeyn dheeraad ah. Si kastaba, Ilhaan Cumar ayaa diiday eedeymahaas, iyadoo sheegtay in hadalkeeda si qalloocan loo turjumay.
Xafiiskeeda ayaa soo saaray turjumaad kale oo muujinaysa in fariinteedu ay ahayd mid ku saabsan kalsooni, isku duubni iyo ka shaqeynta danaha muwaadiniinta ay matasho, isla markaana aysan jirin wax muujinaya in ay ka hormarineyso dan gaar ah tan Mareykanka..
