Wararka24: Maamulka Jubaland ayaa si kulul u cambaareeyay tallaabo ay ku eedeeyeen Dowladda Federaalka Soomaaliya inay ku hor istaagtay diyaarad rayid ah oo ay leedahay shirkadda Maandeeq Air, taas oo rakaab ka qaaday magaalada Kismayo kuna sii jeeday Dhobley.
War-saxaafadeed ay soo saartay Wasaaradda Warfaafinta Jubaland ayaa lagu sheegay in diyaaradda, oo lambarkeedu ahaa 5Y IFY, lagu amray inay u leexato magaalada Muqdisho ama ay ka degto garoonka diyaaradaha ee Wajeer.
Jubaland ayaa ku tilmaantay tallaabadaasi mid sharci darro ah oo ka hor imaanaysa xeerarka iyo heshiisyada caalamiga ah ee hagaya duulimaadyada rayidka ah, kuwaas oo mamnuucaya in adeegyada rayidka loo adeegsado dano siyaasadeed.
Maamulka ayaa sidoo kale sheegay in dhacdadani ay khatar ku tahay badqabka rakaabka, xorriyadda isu socodka shacabka Soomaaliyeed iyo kalsoonida lagu qabo nidaamka duulimaadyada rayidka ah ee dalka.
Qoraalka kasoo baxay Jubaland ayaa lagu eedeeyay Dowladda Federaalka inay hawada Soomaaliya u adeegsanayso aalad siyaasadeed halkii ay ka ahaan lahayd adeeg qaran oo si siman loogu adeego dhammaan shacabka Soomaaliyeed.
Jubaland ayaa ugu baaqday hay’adaha caalamiga ah ee qaabilsan duulista rayidka ah, gaar ahaan International Civil Aviation Organization iyo hay’adaha kale ee caalamiga ah ee qaabilsan duulista rayidka inay si dhow ula socdaan dhacdadan iyo waxa ay ku tilmaantay xadgudubyada soo noqnoqday ee ka dhanka ah duulimaadyada rayidka ah.
Ilaa hadda ma jirto war rasmi ah oo Dowladda Federaalka Soomaaliya kasoo saartay eedeymaha ay Jubaland ka gudbisay dhacdadan.
